काठमाडौं । फरवार्ड माइक्रोफाइनान्स लघुवित्त वित्तीय संस्था घाटामा गएको छ । लघुवित्तले आइतबार सार्वजनिक गरेको चालु आर्थिक वर्ष २०८०/८१ को पहिलोे त्रैमासको अपरिष्कृत वित्तीय विवरण अनुसार ११ करोड ९ लाख रुपैयाँ नोक्सानीमा रहेको हो ।
जबकि लघुवित्तले गत वर्षको पहिलो त्रैमासमा ६ करोड ५२ लाख रुपैयाँ नाफा कमाएको थियो । खुद ब्याज आम्दानी, सञ्चालन नाफा घट्नुका साथै खराब कर्जा अचाक्ली बढेर इम्पेयरमेन्ट चार्ज बढ्दा लघुवित्त घाटामा गएको हो ।
समीक्षा अवधिमा लघुवित्तको खुद ब्याज आम्दानी ८.८१ प्रतिशत घटेर २६ करोड ९५ लाख रुपैयाँमा सीमित भएको छ । त्यस्तै, संचालन मुनाफा १० करोड ५१ लाख रुपैयाँ ऋणात्मक भएको छ । लघुवित्तको गत वर्ष पहिलो त्रैमासमा संचालन मुनाफा ९ करोड ३५ लाख रुपैयाँ थियो ।
लगानी गरेको ऋण असुली नहुँदा खराब कर्जा बढेपछि लघुवित्तले समीक्षा अवधिमा ३० करोड ४९ लाख रुपैयाँ प्रोभिजन गरेको छ । समीक्षा अवधिमा लघुवित्तले ८ अर्ब ४३ करोड निक्षेप संकलन गरी कुल १९ अर्ब १६ करोड ऋण लगानी गरेको छ ।
हाल १ अर्ब ५ करोड रुपैयाँ चुक्ता पूँजी रहेको लघुवित्तको सेयर रिटेन्ड अर्निङमा ६० करोड ८८ लाख र जगेडा कोषमा १ अर्ब १४ करोड रुपैयाँ संचित छ । समीक्षा अवधिमा लघुवित्तको वितरणयोग्य नाफा ६० करोड ८८ लाख रुपैयाँ रहेको छ ।
घाटामा गएसँगै लघुवित्तको प्रतिसेयर आम्दानी पनि ऋणात्मक भएको छ । समीक्षा अवधिमा लघुवित्तको प्रतिसेयर आम्दानी ३०.८९ रुपैयाँबाट घटेर ४२.०६ रुपैयाँ ऋणात्मक भएको छ ।
यस अवधिमा लघुवित्तको प्रतिसेयर नेटवर्थ २६५.६८ रुपैयाँ छ भने खराब कर्जा २.६ प्रतिशतबाट बढेर ६.२५ प्रतिशत पुगेको छ ।
