काठमाडौं । सेयर बजार अहिले २७ महिना यताकै तल्लो बिन्दुमा आएको छ । २०७८ भदौमा इतिहासकै सर्वाधिक ३१९८ विन्दु छोएको नेप्से त्यसयता लगातार घटेर अहिले १८५० विन्दुको वरिपरी घुमिरहेको छ ।
दुई वर्षको अवधिमा नेप्से ५ पटक १८०० विन्दुमा आइसकेको छ । यो विन्दुबाट बढेर २२०० विन्दु पुग्ने अनि फेरि घटेर १८०० हाराहारीमा आउने गरेको छ । पछिल्लो २ वर्षको अवधिमा नेप्से करिब १३०० अंकले घटिसकेको छ भने घट्ने क्रम अझै रोकिएको छ ।
नेप्से लगातार घटेसँगै सूचीकृत कम्पनीहरूको सेयर मूल्य पनि २ वर्ष यताकै सस्तो मूल्यमा आएका छन् । नेप्सेमा विभिन्न १३ समूहका २४० बढी कम्पनी सूचीकृत छ । तीमध्ये झन्डै साढे ३ दर्जन कम्पनीको सेयर मूल्य प्रतिकित्ता २०० रुपैयाँभन्दा कम छ । नेप्सेले कीर्तिमानी सर्वाधिक विन्दुको रेकर्ड बनाउँदा अधिकांश कम्पनीको न्यूनतम सेयर मूल्य नै प्रतिकित्ता ३५० रुपैयाँ माथि थियो ।
नेप्सेमा विभिन्न १३ समूहका कम्पनीहरू सूचीकृत छ । तीमध्ये वाणिज्य बैंक र हाइड्रोपावर कम्पनीहरूको सेयर मूल्य सबैभन्दा सस्तो छ । तुलनात्मक रुपमा उत्पादनमूलक कम्पनी, माइक्रोफाइनान्स, बीमा कम्पनी, फाइनान्स कम्पनीको सेयर मूल्य धेरै रहेको छ ।
नेप्सेमा सूचीकृत १९ वाणिज्य बैंकमध्ये ८ बैंकको सेयर भाउ प्रतिकित्ता २०० रुपैयाँभन्दा कम छ । हाइड्रोपावर कम्पनीको तुलनामा सेयरधनीलाई लाभांश दिने भए पनि धेरै पूँजी भएका कारण वाणिज्य बैंकहरूको सेयर मूल्य सस्तो भएको हो ।
त्यस्तै, नेप्सेमा सूचीकृत ८७ वटा हाइड्रोपावर मध्ये २८ कम्पनीको सेयर मूल्य २०० रुपैयाँभन्दा कम छन् । तुलनात्मक रुपमा सेयरधनीलाई लाभांश नदिने कम्पनीमा पर्छन् हाइड्रोपावर । त्यस्तै, अरु समूहका कम्पनीकोभन्दा हाइड्रोपावरहरूको वित्तीय अवस्था पनि कमजोर छ । सूचीकृत ८७ कम्पनी मध्ये आधा बढी घाटामा छन् । तर, धेरै चलखेल हुने हाइड्रोको सेयर मूल्य बिना आधरै ह्वात्तै बढ्ने र घट्ने गरेका छन्
वित्तीय अवस्था कमजोर भएका हाइड्रोपावर कम्पनीको सेयर भाउ घट्दो बजारमा लगातार घटेको हो । केही कम्पनीको सेयर मूल्य २ वर्षको अवधिमै ७५ प्रतिशतसम्म घटेको छ ।
यी हुन् २०० रुपैयाँभन्दा कममा पाइने कम्पनी
नेप्सेमा सूचीकृत कम्पनी मध्ये हाल ३९ कम्पनीको सेयर मूल्य २०० रुपैयाँभन्दा कम छ । जसमा ८ वाणिज्य बैंक, २८ हाइड्रोपावर, २ लगानी समूहका र एउटा लघुवित्त समूहका छन् ।
वाणिज्य बैंकतर्फ कुमारी, प्रभु, सिटजन्स, नेपाल इन्भेष्टमेन्ट, लक्ष्मी सनराइज, प्राइम कमर्शियल, माछापुच्छ्रे र हिमालयन बैंकको सेयर भाउ २०० रुपैयाँभन्दा कम छ । जसमा सबैभन्दा सस्तो कुमारी बैंकको प्रतिकित्ता १५१.७ रुपैयाँ मात्रै छ ।
यसैगरी, लगानी समूहका हाइड्रोइलेक्ट्रीसिटी इन्भेष्टमेन्ट एण्ड डेभलपमेन्ट कम्पनी र नेपाल इन्फ्रास्ट्रक्चर बैंकको सेयर मूल्य २०० रुपैयाँभन्दा कम छ ।
लघुवित्त समूहको समाज लघुवित्तको सेयर मूल्य प्रतिकित्ता १०० रुपैयाँभन्दा पनि कम छ । यद्यपि, यसको सेयर मूल्य घटेको नभई न्यून मूल्यमा कारोबार खुलेको र नियमित कारोबार हुन नसक्दा नबढेको हो । नेप्सेमा सूचीकृत लघुवित्तहरूको न्यूनतम सेयर मूल्य नै प्रतिकित्ता ५०० रुपैयाँ माथि छ ।
यस्तै, नेप्सेमा सूचीकृत समूहमध्ये सबैभन्दा धेरै सस्ता कम्पनी हाइड्रोपावर समूहका छन् । यस समूहका २८ कम्पनीको सेयर मूल्य २०० रुपैयाँभन्दा कम छ । केहीको त झन्डै आइपीओकै हाराहारीमा आएको छ । जसमा हिमाल दोलखा हाइड्रोपावरको सबैभन्दा सस्तो प्रतिकित्ता १२० रुपैयाँ मात्र छ ।
यसैगरी, नेशनल, घलेम्दी, शिवश्री, दिव्यश्वरी, लिबर्टी इनर्जी र आँखुखोलाको सेयर मूल्य प्रतिकित्ता १५० रुपैयाँभन्दा कम छ । मोदी इनर्जी, यूनियन, अरुण काबेली, सिनर्जी पावर, पञ्चकन्या माइ, अपि पावर, खानीखोला, युनिभर्सल पावर र युनाइटेड मोदीको सेयर मूल्य १५० देखि १७५ रुपैयाँ बीचमा छ ।
यस्तै, माउन्टेन, जोशी, रिडी पावर, मनकामना इन्जिनीयरिङ, मोलुङ, न्यादी, अपर तामाकोशी, ङादी, हिमालयन, भूगोल इनर्जी, दोल्ती पावर र राप्ती हाइड्रोको सेयर मूल्य १७५ रुपौँदेखि २०० रुपैयँको बीचमा छ ।
