काठमाडौं । काठमाडौं-तराई/मधेस द्रुतमार्ग (फाष्ट ट्रयाक)मा निर्माणाधीन सुरुङमार्गको कामले गति लिएको छ । गत वर्षदेखि खन्न थालिएको ३ वटा सुरुङको समग्रमा आधा काम सकिएको हो ।
नेपाल सेनाका ब्रिगेडियन जेनेरल तथा सूचना अधिकारी कृष्णप्रसाद भण्डारीका अनुसार हालसम्म सुरुङ खन्ने काम ४९.१६ प्रतिशत सम्पन्न भएको छ ।
फास्ट ट्रयाकको धेद्रे, लेनडाँडा र महादेवटारमा अहिले धमाधम सुरुङ खन्ने काम भइरहेको छ । जसमा महादेवटारमा ३.४ किलोमिटर लामो सुरुङ खन्नुपर्नेमा हालसम्म १.४९० किलोमिटर सुरुङ खनिसकिएको उनले जानकारी दिए ।
त्यसैगरी, १.४३ किलोमिटर लामो लेनडाँडा सुरुङमार्गमध्ये हालसम्म ८५७ मिटर सुरुङ खन्ने काम सम्पन्न भएको छ । धेद्रेमा १.६३ किलोमिटर लामो सुरुङ खन्नुपर्नेमा ८०६ मिटर खन्ने काम सकिएको उनले बताए ।
निर्माणाधीन ३ वटा सुरुङमध्ये लेनडाँडा र धेद्रे सुरुङ सन् २०२४ को अप्रिल अन्तिम (चैत्र/वैशाख)सम्म ब्रेक थ्रु हुने प्रवक्ता भण्डारीले बताए ।
‘अहिले निर्माण कम्पनीले सुरुङ खन्ने कामलाई तीव्रता दिएको छ । दैनिक काम २ सिफ्टमा भइरहेको छ,’ उनले चाणक्य पोष्टसँग भने, ‘यही गतिमा काम भए वैशाखभित्रै लेनडाँडा र धेद्रेको सुरुङको ब्रेक थ्रु हुन्छ । चिनियाँले अप्रिलसम्ममा काम सक्छौं भनेका छन् ।’
यी दुई सुरुङमार्ग निर्माण चिनियाँ कम्पनी पोली चाङडा इन्जिनेरिङ गरिरहेको छ । सुरुङमार्गमा दैनिक १५० जना जनशक्ति कार्यरत छन् ।
यस्तै, प्याकेज १ अन्तर्गत महादेवटारमा पनि सुरुङ निर्माणले गलि लिएको छ । फाष्ट ट्रयाक निर्माणाधीन मध्ये यो सबैभन्दा लामो सुरुङ हो । आगामी आर्थिक वर्ष भित्र यसको पनि काम पूरा हुने लक्ष्य राखिएको छ । यसमा पनि दिन र रात गरेर २ सिफ्टमा काम भइरहेको छ ।
थप ३ वटा सुरुङमार्ग ठेक्का प्रक्रियामा
फाष्ट ट्रयाक अन्तर्गत नै थप ३ सुरुङ निर्माण हुने भएका छन् । आयोजना अन्तर्गत देवीचौर, सिसौटार र चन्द्राम भीरमा सुरुङ निर्माणका लागि ठेक्का आह्वान भइसकेको सूचना अधिकारी भण्डारीले बताए ।
अबको २/३ महिना भित्रै थप ३ सुरुङ निर्माणको ठेक्का लाग्ने उनले बताए । चालु आवभित्रै ती सुरुङ निर्माण सुरू गर्ने उनले बताए । उनका अनुसार देवीचौरमा १ किलोमिटर, सिसौटारमा ०.३९ किलोमिटर र चन्द्राम भीरमा २.२५ किलोमिटर लामो सुरुङ निर्माण हुनेछ । ३ वटा नयाँ सुरुङ थपिएसँगै फास्ट्रयाकमा कुल सुरुङमार्गको लम्बाइ १०.०५५ किलोमिटर पुग्नेछ ।
आयोजनाको हालसम्म करिब एकचौथाई काम सकिएको छ । आर्थिक वर्ष २०७४/७५ देखि निर्माण सुरु गरिएको यस आयोजनाको २७ प्रतिशत भौतिक प्रगति भएको छ । २०८१ भित्र निर्माण सम्पन्न गर्नुपर्ने भए पनि तोकिएकै सममा काम सम्पन्न नहुने भएपछि हालै म्याद थपिएको छ । थपिएको म्याद अनुसार अब २०८३ सम्म सम्पन्न गर्नुपर्नेछ ।
ललितपुरको खोकनाबाट सुरु भई काठमाडौं, मकवानपुर हुँदै बाराको निजगढमा पुगेर पूर्वपश्चिम राजमार्गमा जोडिने उक्त द्रुतमार्गको संशोधित लम्बाइ ७०.९७७ किलोमिटर छ । पुरानो डीपीआर अनुसार फास्ट ट्रयाकको कुल लम्बाइ ७२.७२९ किलोमिटर रहेको थियो ।
आयोजनाको संशोधित अनुमानित लागत २ खर्ब ११ अर्ब ९३ करोड ररुपैयाँ रहेको छ । चालु आर्थिक वर्षमा यस आयोजनालाई २२ अर्ब ५० करोड रुपैयाँ बजेट विनियोजन गरिएको छ ।
