काठमाडौं । अर्थतन्त्रमा आएको संकुचनका बाबजूद जीवन बीमा व्यवसायमा सुधार देखिएको छ । चालु आर्थिक वर्षको पहिलो त्रैमासमा जीवन बीमा कम्पनीहरूले बीमा शुलक आर्जन गत वर्षको सोही अवधिको तुलनामा १४.०६ प्रतिशतले बढाउन सफल भएका हुन् ।

नेपाल बीमा प्राधिकरणका अनुसार असोज मसान्तसम्म जीवन बीमा कम्पनीहरुले कुल ४० अर्ब ८० करोड रुपैयाँ कुल प्रिमियम संकलन गरेका छन् । यो गत वर्षको सोही अवधिको तुलनामा ५ अर्ब २ करोड रुपैयाँ बढी हो । गत वर्ष पहिलो त्रैमासमा बीमा कम्पनीहरूले ३५ अर्ब ७७ करोड रुपैयाँ कुल बीमा शुल्क आर्जन गरेका थिए ।

यद्यपि, कुल बीमा शुल्क संकलन बढे पनि प्रथम बीमा शुल्क आर्जन भने ५.३० प्रतिशत अर्थात ३७ करोड रुपैयाँले घटेको छ । नवीकरण शुल्क बढ्दा बीमा कम्पनीहरूको समग्र व्यवसायमा सुधार देखिएको तथ्यांकले देखाउँछ ।

कम्पनीहरूको बीमालेख संख्या घट्दा प्रथम बीमा शुल्क घटेको तथ्यांकले देखाउँछ । यस वर्षको पहिलो तीन महिनामा बीमा कम्पनीको १८ हजार ४०६ ले घटेको हो । गत वर्षको असोजसम्म १ करोड ३८ लाख ८३ हजार कुल सक्रिय बीमा लेख रहेकोमा यस वर्षको सोही अवधिमा १ करोड ३८ लाख ६४ हजार सक्रिय बीमा लेखको संख्या रहेको छ ।

कुनले कति गरे बीमा शुल्क संकलन ?

कुल बीमा शुल्क संकलनमा नेपाल लाइफ इन्स्योरेन्सको सबैभन्दा धेरै हिस्सा रहेको छ । यस कम्पनी एक्लैले कुल जीवन बीमा व्यवसायको झन्डै एकतिहाई हिस्सा ओगटेको छ । पहिलो त्रैमासमा कम्पनीले १० अर्ब ९५ करोड रुपैयाँ बीमा प्रिमियम संकलन गरेको छ ।

बीमा प्राधिकरणका अनुसार सबैभन्दा आक्रामक व्यवसाय बढाउनेमा राष्ट्रिय बीमा संस्थान पहिलो स्थानमा छ । यस कम्पनीले गत वर्ष १ अर्ब ११ करोड रुपैयाँ बीमा शुल्क आर्जन गरेकोमा २२३ प्रतिशतले वृद्धि गरेर ४ अर्ब रुपैयाँ पुर्याएको छ ।

असोज मसान्तसम्म लाइफ इन्स्योरेन्स कर्पोरेसनले ४ अर्ब ५० करोड रुपैयाँ प्रिमियम संकलन गरेको छ । नेशनल लाइफ, हिमालयन लाइफले ४/४ अर्ब रुपैयाँ बढीले प्रिमियम संकलन गरेका छन् ।

सबैभन्दा कम सन नेपाल लाइफ इन्स्योरेन्सले ८८ करोड ६४ लाख रुपैयाँ बीमा शुल्क आर्जन गरेको छ । यसैगरी, सूर्यज्योती २ अर्ब ३० करोड, मेटलाइफ, एसियन लाइफ, आइएमई लाइफ, रिलायबल लाइफ, सिटिजन, सानिमा र प्रभु महालक्ष्मी लाइफ इन्स्योरेन्स कम्पनीले १/१ अर्ब रुपैयाँ बढी बीमा शुल्क आर्जन गरेका छन् ।