काठमाडौं । सानिमा बैंकले रुकुम पश्चिम र जाजरकोटका भूकम्प प्रभावितको सहयोगका लागि २५ लाख रुपैयाँ आर्थिक सहयोग गर्ने भएको छ ।
बैंकले भूकम्प प्रभावितको राहतका लागि प्रधानमन्त्री दैवी प्रकोप राहत उद्धार कोषमा २५ लाख रुपैयाँ सहयोग गर्ने घोषणा गरेको हो ।
आफ्नो संस्थागत सामाजिक उत्तरदायित्व अन्तर्गत भूकम्प प्रभावितको राहतका लागि उक्त रकम सहयोग गर्ने घोषणा गरिएको बैंकले जनाएको छ ।
शुक्रबार राति गएको भूकम्पमा परी जाजरकोटमा १०५ र रुकुम पश्चिममा ५२ जना गरी १५७ जनाको मृत्यु भएको थियो भने १०० बढी घाइते भएका छन् ।
सानिमा बैंकको देशका सातै प्रदेशमा १३२ वटा कार्यालय तथा १२३ वटा एटीएम संचालनमा रहेका छन् ।
