काठमाडौं । नेपाल इन्भेटमेन्ट मेगा बैंकको खुद नाफामा उल्लेख्य सुधार आएको छ । बैंकले शुक्रबार सार्वजनिक गरेको चालु आर्थिक वर्ष २०८०/८१ को पहिलो त्रैमासको अपरिष्कृत वित्तीय विवरण खुद नाफा ३३.४६ प्रतिशतले बढेको हो ।
बैंकले असोज मसान्तसम्म १ अर्ब ५२ करोड २२ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा ३८ करोड रुपैयाँ बढी हो । बैंकले गत वर्ष पहिलो त्रैमासमा १ अर्ब १४ करोड ५ लाख रुपैयाँ खुद नाफा कमाएको थियो ।
समीक्षा अवधिमा बैंकको खुद ब्याज आम्दानी र संचालन नाफामा उल्लेख्य सुधार आउँदा खुद नाफामा बढोत्तरी आएको हो ।
पहिलो त्रैमासमा इन्भेष्टमेन्टले खुद नाफामा नबिल बैंकलाई उछिन्दै सर्वाधिक नाफा बमाउने वाणिज्य बैंक बनेको छ । इन्भेष्टमेन्टले नबिलकोभन्दा५ करोड ७० लाख रुपैयाँ धेरै नाफा कमाएको छ । नबिलले असोजसम्म १ अर्ब ४६ करोड ९३ लाख खुद नाफा कमाएको छ ।
समीक्षा अवधिमा इन्भेष्टमेन्टको खुद ब्याज आम्दानी ९३.२८ प्रतिशतले बढेर ४ अर्ब ११ करोड रुपैयाँ पुगेको छ । त्यस्तै, सञ्चालन नाफा ५९.९० प्रतिशतले बढेर २ अर्ब ६० करोड रुपैयाँ पुगेको छ ।
समीक्षा अवधिमा बैंकले ३ खर्ब ६१ अर्ब रुपैयाँ निक्षेप संकलन गरी ३ खर्ब ४ अर्ब रुपैयाँ कर्जा प्रवाह गरेको छ । हाल ३४अर्ब १२ करोड चुक्ता पूँजी रहेको बैंकको रिटेन्ड अर्निङ ८५ करोड ३२ लाख ऋणात्मक छ । जगेडा कोषमा २५ अर्ब ८९ करोड रुपैयाँ सञ्चित छ । समीक्षा अवधिमा बैंकको वितरणयोग्य नाफा १ अर्ब १ करोड रुपैयाँ ऋणात्मक छ ।
खुद नाफा बढे पनि बैंकको प्रतिसेयर आम्दानी भने घटेको छ । गत वर्ष २४.९२ रुपैयाँ रहेको बैंकको प्रतिसेयर आम्दानी ७.०८ रुपैयाँ घटेर १७.८४ रुपैयाँमा झरेको छ ।
समीक्षा अवधिमा बैंकको प्रतिसेयर नेटवर्थ १७३.३७ रुपैयाँ, खराब कर्जा ४.८३ प्रतिशत, बेसरेट ९.९९ प्रतिशत र सीडी रेसियो ८३.८२ प्रतिशत रहेको छ ।
