काठमाडौं । नेपाल आयल निगमले डिजेल र मट्टीतेलको मूल्य घटाएको छ । निगमले मंगलबार राति १२ बजेदेखि लागू हुने गरी डिजेल र मट्टीतेलको भाउ प्रतिलिटर ४ रुपैयाँले घटाएको हो ।
अन्तर्राष्ट्रिय बजारमा मूल्य घटेसँगै भारतीय आयल निगमले पनि भाउ घटाएर पठाएकाले स्वचालित प्रणालीअनुसार मूल्य समायोजन गरिएको निगमले जनाएको छ ।
निगमका अनुसार अब काठमाडौं उपत्यकामा डिजेल र मट्टीतेलको मूल्य प्रतिलिटर १६४ रुपैयाँ पर्नेछ । यसअघि भने काठमाडौं उपत्यका, पोखरा र दिपायलमा डिजेल र मट्टितेलको भाउ प्रतिलिटर १६८ रुपैयाँ थियो ।
निगमले पेट्रोल र एलपी ग्यासको मूल्य भने यथावत नै राखेको छ । पेट्रोलको मूल्य प्रतिलिटर १.५१ रुपैयाँ र खाना पकाउने एलपी ग्यास प्रतिसिलिण्डर ९३.६० रुपैयाँ बढेर आए पनि चाडपर्वको बेला उपभोक्ताको हितलाई ध्यानमा राख्दै यथावत राखिएको नियगमको भनाइ छ । यसअघि निगमले असोज २८ गते पेट्रोलको भाउ लिटरमै ११ रुपैयाँ घटाएको थियो ।
