काठमाडौं । नेरुडे लघुवित्त वित्तीय संस्था र मिर्मिरे लघुवित्त वित्तीय संस्थाले मर्जरका लागि अन्तिम स्वीकृति पाएका छन् ।
नेपाल राष्ट्र बैंकले दुई लघुवित्त मर्ज हुन कात्तिक ३ गते अन्तिम स्वीकृति दिएको हो । मर्जरपछि दुवै लघुवित्तले ‘नेरुडे मिर्मिरे लघुवित्त वित्तीय संस्था’को नामबाट एकीकृत कारोबार सुरु गर्नेछन् ।
मोरङको विराटनगर महानगरपालिका वडा नं. ३ मा केन्द्रीय कार्यालय रहेको नेरुडे लघुवित्त र काभ्रेपलाञ्चोकको बनेपा नगरपालिका वडा नं. ८ मा केन्द्रीय कार्यालय रहेका दुई लघुवित्त मर्ज हुन लागेका हुन् ।
दुवै लघुवित्त समान हैसियत अर्थात् १ः१ सेयर अनुपातमा मर्ज हुने भएका हुन् । दुई लघुवित्त बीच गत पुस ११ गते गाभ्ने/गाभिने सम्बन्धी प्रारम्भिक सम्झौता भएको थियो भने चैत १६ गते अन्तिम सम्झौता गरेका थिए ।
हाल नेरुडेको चुक्ता पूँजी ७३ करोड २० लाख रुपैयाँ रहेको छ मिर्मिरेको ६५ करोड ३३ लाख रुपैयाँ रहेको छ । मर्जपछि नयाँ एकीकृत चुक्ता पूँजी १ अर्ब ३८ करोड रुपैयाँ पुग्नेछ ।
