काठमाडौं । सेयर बजारमा दोहोरो अंकको गिरावट आएको छ । दुई दिनको गिरावटपछि मंगलबार १८ अंकले फर्केको नेप्से आज त्यत्ति नै अंकले घटेको हो ।
नेप्से परिसूचक १८.६० अंकले घटेर २००४.३० विन्दुमा आइपुगेको छ । आज २८२ कम्पनीको ७० लाख ६१ हजार ४०४ कित्ता सेयर किनबेच भएको छ ।
सूचकसँगै आज कारोबार रकममा पनि गिरावट आएको छ । अघिल्लो दिनको तुलनामा कारोबार रकम २८ करोडले घटेर १ अर्ब ८१ करोड रुपैयाँमा सीमित भएको छ ।
आज कारोबारमा आएका १३ वटै समूहको परिसूचक राताम्मे भएको छ । हाइड्रोपावर समूहको परिसूचक सबैभन्दा धेरै १.५१ प्रतिशतले घटेको छ ।
आज सन नेपाल लाइफ इन्स्योरेन्सको सर्वाधिक कारोबार भएको छ । यसको साढे ७ करोड रुपैयाँ बढीको सेयर किनबेच भएको छ ।
दोहोरो अंकले घटेको बजारमा आज लक्ष्मी भ्यालु फण्ड २ र शुभम पावरको सेयर मूल्यमा नेगेटिभ सर्किट लागेको छ । यी कम्पनीका सेयरधनीले १० प्रतिशत गुमाएका छन् ।
घट्दो बजारमा आज मनकामना इन्जिनीयरिङका सेयरधनीले भने करिब १० प्रतिशत कमाएका छन् ।
