काठमाडौं । काम गर्ने वातावरण नभएको भन्दै त्रिभुवन अन्तर्राष्ट्रिय विमानस्थल भन्सारका कर्मचारीहरु आन्दोलित भएका छन् । ६१ किलो सुन प्रकरणमा विमानस्थल भन्सारका कर्मचारी समातिएको भन्दै उनीहरुले सोमबार भन्सार जाँचपास सम्बन्धी काम ठप्प पारेका हुन् ।
२ साउनमा विमानस्थल भन्सारमा समातिएको ६१ केजी तस्करीको सुन प्रकरणमा अनुसन्धानका लागि प्रहरीको केन्द्रीय अनुसन्धान ब्यूरो (सीआइबीले)ले हालसम्म ६ जना भन्सार कर्मचारीलाई पक्राउ गरिसकेको छ । अन्य केही कर्मचरीविरुद्ध पक्राउ पूजी जारी भएको र केही माथि अनावश्यक धरपकड भएको भन्दै उनीहरु आन्दोलित भएका हुन् ।
उनीहरु विभिन्न माग राख्दै आन्दोलनमा उत्रिएका हुन् । उनीहरुले अनुसन्धानको बहानामा निर्दोष कर्मचारीहरूलाई धरपकड गर्ने र पक्राउ गर्ने काम अविलम्ब बन्द गर्नुपर्ने, कार्यस्थलमा डरत्रास बिना, निर्भिक रुपमा उच्च मनोबलका साथ कार्य गर्ने वातावरण हुनुपर्ने, कार्यालयमा आवश्यक भौतिक पूर्वाधारहरू आधुनिक प्रविधिहरूको व्यवस्था गर्नुपर्ने लगायत माग राखेका छन् ।
यसअघि भदौ १२ गते विमानस्थल भन्सारका कर्मचारीहरुले काम गर्ने वातावरण नभएको भन्दै सामूहिक सरुवा मागेको थिए भने आफ्ना माग पूरा नभए आन्दोलन गर्ने चेतावनी दिएका थिए । सरकारी निकायहरुले अनुसन्धानका नाममा कर्मचारीहरूको मनोबल गिराउने, आत्मसम्मानमा ठेस पुर्याउने, हतोत्साहित गर्ने गरेको उनीहरुको गुनासो छ ।
