काठमाडौं । नेपाल लगानी बोर्डले चार वटा जलविद्युत आयोजनाको लगानी स्वीकृत गरेको छ। शुक्रबार प्रधानमन्त्री एवं लगानी बोर्डका अध्यक्ष पुष्पकमल दाहाल ‘प्रचण्ड’को अध्यक्षतामा बसेको बैठकले कुल ३६ अर्ब ३७ करोड रुपैयाँ लगानीका चार हाइड्रोपावरको लगानी स्वीकृत गरेको हो ।
लगानी बोर्डका अनुसार रोल्वालिङ खोला, छुजुङ्ग खोला, दाना खोला र सानीभेरी जलविद्युत् परियोजनाका लागि कुल ३६ अर्ब ३७ करोड रुपैयाँ बराबरको लगानी स्वीकृत भएको छ ।
त्यसैगरी, बार्ड बैठकले तमोर जलाशययुक्त जलविद्युत परियोजना कार्यान्वयन अघि बढाउने सम्बन्धमा हालसम्मको विकासक्रमको समीक्षा गर्दै परियोजनाको भावी कार्यदिशासम्बन्धी सुझाव पेश गर्न उच्चस्तरीय समिति गठन गर्ने निर्णय गरेको छ।
त्यस्तै, बोर्डले माथिल्लो कर्णाली जलविद्युत् परियोजनाको सम्बन्धमा सर्वोच्च अदालतबाट जारी भएको निर्देशनात्मक आदेश कार्यान्वयनका लागि मन्त्रिपरिषद् समक्ष प्रस्ताव पेश गर्ने निर्णय गरेको छ।
त्यस्तै, दाङको राजपुर गाउँपालिकामा २४५ मेगावाट र २० मेगावाट ब्याट्री क्षमताका सौर्य ऊर्जा परियोजनाको अध्ययनका लागि डोल्मा हिमालयन इनर्जीलाई अध्ययन अनुमतिपत्र दिने निर्णय गरेको छ ।
बोर्डले बाँकेको कोहलपुर र कपिलवस्तुको वाणगंगामा २५० मेगावाटको सौर्य ऊर्जा विकासका लागि अध्ययनकर्ता राइजन इनर्जीले पेस भएको विस्तृत सम्भाव्यता अध्ययन प्रतिवेदनलाई जानकारीमा लिएको जनाएको छ ।
बोर्ड बैठकले ग्रिन क्याल्सिमय अमुनियम नाइट्रेट फर्टिलाइजर फ्याक्ट्री स्थापनाको अध्ययन गर्न मलेसियाली कम्पनी रिनिकोलासँग गरिने समझदारीको मस्यौदा स्वीकृत गरेको छ।
