काठमाडौं । गत आर्थिक वर्ष २०७९/८० मा निर्जीवन बीमा कम्पनीले ४० अर्ब रुपैयाँ बीमा शुल्क संकलन गरेका छन् । नेपाल बीमा प्राधिकरणका अनुसार गत वर्ष १४ वटा निर्जीवन बीमा कम्पनीले कुल ४० अर्ब २१ करोड २१ लाख रुपैयाँ बीमा शुल्क आर्जन गरेका हुन् ।
अघिल्लो वर्षको तुलनामा बीमा निर्जीवन बीमा कम्पनीको व्यवसाय सामान्य वृद्धि भएको छ । प्राधिकरणका अनुसार समीक्षा अवधिमा कम्पनीहरूले औषतमा २.६६ प्रतिशतले व्यवसायी बढाएका हुन् ।
अघिल्लो वर्षको सोही अवधिमा निर्जीवन बीमा कम्पनीले ३९ अर्ब १६ करोड ९९ लाख रुपैयाँ बीमा शुल्क आर्जन गरेका थिए । गत वर्ष कम्पनीहरूले कुल २७ लाख ९२ हजार ५१६ बीमालेख जारी गरेको प्राधिकरणले जनाएको छ ।
अघिल्लो वर्षको सोही अवधिमा २७ लाख ८८ हजार कुल बीमालेख जारी गरेका थिए । अर्थतन्त्रमा देखिएको असर बीमा व्यवसायमा पनि देखिएको छ । गत वर्ष जीवन बीमा कम्पनीको व्यवसाय २५ प्रतिशतले घट्दा निर्जीवनको भने सामान्य बढेको देखिन्छ ।
अर्थतन्त्रको शिथिलताले मानिसको आयस्रोत कमजोर भएको छ भने बचत र खर्च क्षमता पनि सोही अनुसार घटेको छ । जसको कारण बैंक तथा वित्तीय व्यवसाय पनि प्रभावित भएको छ । अर्थतन्त्रमा देखिएको सोही समस्याको कारण बीमा पोलिसी त्याग्ने क्रम पनि व्यापक बढेको प्राधिकरणको तथ्यांकले देखाउँछ ।
तीन कम्पनीको व्यवसाय घट्यो
गत वर्ष असार मसान्तसम्म सञ्चालनमा रहेका १४ वटा निर्जीवन बीमा कम्पनी मध्ये ३ कम्पनीको व्यवसाय घटेको छ । सबैभन्दा धेरै राष्ट्रिय बीमा कम्पनीको १२.७१ प्रतिशतले व्यवसायमा गिरावट आएको छ । यस कम्पनीले अघिल्लो वर्ष २ अर्ब ६४ करोड कुल बीमा शुल्क संकलन गरेकोमा गत वर्ष २ अर्ब २३ करोड रुपैयाँमा सीमित भएको छ ।
दोस्रोमा सिद्धार्थ प्रिमियर कम्पनीको ६.९७ प्रतिशतले बीमा शुल्क संकलन घटेको छ । अघिल्लो वर्ष ४ अर्ब ७५ करोड रुपैयाँ बीमा शुल्क आर्जन गरेको कम्पनीले गत वर्ष ४ अर्ब ४२ करोड रुपैयाँ प्रिमियम संकलन गरेको छ ।
यसैगरी, लुम्बिनी र सगरमाथा मर्जर भएर बनेको सगरमाथा लुम्बिनी इन्स्योरेन्सको पनि व्यवसायमा सामान्य गिरावट आएको छ । यस कम्पनीको २.२३ प्रतिशतले बीमा शुल्क घटेर ४ अर्ब ५८ करोड रुपैयाँमा सीमित भएको छ ।
शिखर पहिलो, प्रभु आक्रामक
गत वर्ष निर्जीवन बीमा कम्पनीमा सबैभन्दा धेरै शिखर इन्स्योरेन्सको व्यवसायको हिस्सा रहेको छ । यस कम्पनीले समीक्षा अवधिमा ६.१३ प्रतिशतले प्रिमियम बढाएको छ भने कुल बीमा शुल्क सबैभन्दा धेरै ५ अर्ब ३१ करोड रुपैयाँ बीमा शुल्क आर्जन गरेको छ ।
व्यवसायिक रूपमा धेरै हिस्सा शिखरले ओगटे पनि प्रभु इन्स्योरेन्सले सबैभन्दा धेरै प्रिमियम बढाएको छ । अघिल्लो वर्ष १ अर्ब ३५ करोड बीमा शुल्क आर्जन गरेको यस कम्पनीले गत वर्ष २२.२० प्रतिशतले वृद्धि गरेर १ अर्ब ६५ करोड रुपैयाँ पुर्याएको छ ।
दोस्रोमा सानिमा जीआइसीले १९.४८ प्रतिशतले व्यवसाय बढाएको छ । अघिल्लो वर्ष १ अर्ब ९४ करोड बीमा शुल्क संकलन गरेकोमा गत वर्ष २ अर्ब ३२ करोड रुपैयाँ पुर्याएको छ । सगरमाथा लुम्बिनीले ४ अर्ब ५८ करोड, सिद्धार्थ प्रिमियरले ४ अर्ब ४२ करोड रुपैयाँ बीमा शुल्क संकलन गरेका छन् ।
युनाइटेड अजोड, आइजीआई प्रुडेन्सियल र हिमालयन एभरेष्टले ३/३ अर्ब रुपैयाँ बढी बीमा शुल्क संकलन गरेका छन् । नेको इन्स्योरेन्स, एनएलजी एन्स्योरेन्स, सानिमा जीआइसी र राष्ट्रिय बीमा कम्पनीले २/२ अर्ब रुपैयाँ बढी प्रिमियम संकलन गरेका छन् ।
सबैभन्दा कम बीमा शुल्क संकलन गर्नेमा नेशनल इन्स्योरेन्स कम्पनीले १ अर्ब, ओरियन्टल १ अर्ब ४९ करोड, नेपाल इन्स्योरेन्स १ अर्ब ५८ करोडर प्रभु इन्स्योरेन्सले १ अर्ब ६५ करोड रुपैयाँ बीमा शुल्क संकलन गरेका छन् ।
