काठमाडौं । सेयर बजारमा करेक्शन आएको छ । गत बुधबारदेखि लगातार उकालो लागेको नेप्सेमा ६१ अंकको वृद्धिपछि गिरावट आएको हो ।
सोमबार नेप्से परिसूचक ३.६१ अंकले घटेर २०७७.२४ विन्दुमा आइपुगेको छ । यसदिन २७९ कम्पनीको सेयर कारोबार भएको छ ।
सूचकसँगै आज कारोबार रकममा पनि गिरावट भएको छ । अघिल्लो दिनको तुलनामा कारोबार रकम ९२ करोडले घटेर २ अर्ब ९ करोडमा सीमित भएको छ ।
आज कारोबारमा आएका १३ वटा उपसमूहमध्ये ५ उपसमूहको परिसूचक बढेको छ भने ८ को घटेको छ । हाइड्रोपावर उपसमूहको परिसूचक सबैभन्दा धेरै १.५९ प्रतिशतले घटेको छ ।
आज आइएमई लाइफ इन्स्योरेन्सको सर्वाधिक कारोबार भएको छ । यसको ११ करोड रुपैयाँ बढीको सेयर किनबेच भएको छ ।
झिनो अंकले घटेको बजारमा आज २ कम्पनीको सेयर मूल्यमा पोजेटिभ सर्किट लागेको छ । थ्रीस्टार हाइड्रोपावर र अप्पर स्याङ्गे हाइड्रोपावरको सेयर मूल्य करिब १० प्रतिशतले बढेको छ ।
