काठमाडौं । अनलाइन बस टिकटिङ सेवा प्रदायक बससेवा डटकमले १० दिनसम्म हरके दिन १० जना यात्रुलाई निःशुल्क टिकट उपलब्ध गराउने भएको छ । कम्पनीले दशौँ वर्षमा प्रवेश गरेको अवसरमा यस्तो अफर सार्वजनिक गरेको हो ।
हरेक दिन गोलाप्रथामार्फत १० जनालाई शतप्रतिशत क्यासब्याक प्रदान गरिनेछ । विजेताको नाम बससेवाको आधिकारिक फेसबुक पेजमार्फत सार्वजनिक गरिने बताइएको छ ।
बससेवा टुर्स एण्ड ट्राभल्स् अन्तर्गत रहेर २०७१ साउन २१ गतेबाट आफ्नो सेवा सुरू गरेको बससेवाले यो अवधिमा नेपालका अधिकांश रूटमा सेवा प्रदान गरेको कम्पनीले बताएको छ ।
बससेवाले भारतका नयाँ दिल्ली, बोधगया, मुजफ्फरपुरलगायत शहरमा समेत अनलाइन टिकट बुकिङ्ग सेवा दिंदै आएको छ । हाल दैनिक ३ हजार भन्दा बढी यात्रुले बससेवामार्फत टिकट काटी यात्रा गर्दै आएको कम्पनीका प्रमुख कार्यकारी अधिकृत पीआर खनालले जानकारी दिए ।
यसैबीच, बससेवाले यात्रुहरूलाई बस कुर्न झञ्झट नहोस् भन्ने उदेश्यले काठमाडौको ढुङ्गेअड्डामा प्यासेञ्जर लाउञ्ज समेत सञ्चालनमा ल्याएको छ । लाउञ्जमा यात्रुहरूलाई वाइफाइ, खानेपानी लगायतका सुविधा रहेका छन् भने लाउञ्जबाट सिधै बस चढ्न सकिन्छ । जसले गर्दा यात्रुहरूलाई सडक बिनारामा धुलो खाँदै बस कुर्नुपर्ने बाध्यताको अन्त्य भएको छ ।
खनालका अनुसार अनौपचारिक क्षेत्र मानिएको र प्रविधिको प्रयोग शुन्य रहेको यातायात क्षेत्रलाई प्रविधिमैत्री बनाउन बससेवाले लामै कसरत गर्नुपरे पनि हाल बससेवाप्रति आम यातायात व्यवसायी र यात्री आकर्षित हुँदै गएका छन् ।
खनालले भने, ‘बससेवा डटकमले यातायात क्षेत्रलाई प्रविधिसँग जोड्दै यात्रुहरूलाई अनलाइनमार्फत टिकट प्रदान गर्ने उदेश्यले आफ्नो सेवा सुरू गरेको हो । आगामी दिनमा हाम्रो सेवालाई थप प्रभावकारी बनाउँदै आम यात्रुलाई सहज हुनेगरी सेवा विस्तार गर्दै जानेछौँ ।’
बससेवा डटकम नेपालको एकमात्र अनलाइन बस टिकट काट्ने सेवा प्रदायक हो । यात्रुहरुले कुनै पनि गन्तव्यका टिकट सहजै बससेवा डटकम र बससेवाको मोबाईल एप्स्मार्फत प्राप्त गर्न सक्छन् ।
