काठमाडौं । पछिल्लो समय साहसिक पर्यटनको लोकप्रियता बढ्दै गएको छ । सामान्य घुमफिरमा मात्र सीमित हुने पर्यटन अहिले साहसिक खेलको रूपमा समेत विकसित हुँदै गएको छ ।
विश्वभर प्रसिद्ध हुँदै आएको साहसिक खेल नेपालमा पनि व्यावसायिक रूपमा सञ्चालन हुन थालेको छ । स्वदेशी तथा विदेशी पर्यटकलाई लक्षित गर्दै नेपालमा बन्जी जम्प, जिपलाइन, क्यानोनिङ, स्वीङ, रक क्लाइम्बिङ, स्काइ साइक्लिङ, प्याराग्लाइडिङ, अल्ट्रालाइट लगायतका साहसिक खेलहरू व्यवसायिक रूपमा संञ्चालन हुँदै आएको छ ।
तिनै साहसिक खेलमध्ये एक हो बन्जी जम्प । बन्जी जम्प पुलबाट डोरीको सहायताले हाम फालेर जमिनभन्दा माथि र आकाशबाट तल आनन्द लिने साहासिक खेल हो । बन्जी जम्प गर्नका लागि शारीरिक तथा मानसिक रूपमा स्वस्थ हुनुपर्छ ।
नेपालमा बन्जी जम्प दुईदशक अघि नै सुरू भएको थियो । भोटेकोशी नदीमा वि.सं. २०५८ सालदेखि बन्जी सुरू गरिएको थियो । अहिले भोटेकोशीसँगै, कास्कीको पोखरा र पर्वतको कुश्मामा समेत बन्जी जम्प सञ्चालन हुँदै आएको छ ।
धेरैको रोजाइमा पर्ने यो बन्जी जम्प गर्न कति खर्च लाग्छ त ? हामीले नेपालमा चर्चित यी तीन स्थानमा बन्जी जम्प गर्न लाग्ने खर्चको बारेमा जानकारी तयार पारेका छौं ।
भोटेकाशी बन्जीजम्प : नेपालकै पहिलो यो बन्जी जम्प गर्नका लागि न्यूनतम १० देखि १५ हजार रुपैयाँ खर्च लाग्छ । काठमाडौंबाट १०० किलोमिटरको दूरीमा रहेको यो बन्जी जम्पमा सडकमार्ग हुँदै पुग्न सकिन्छ ।
सिन्धुपालचोक जिल्लाको भोटेकोशी गाउँपालिमा रहेको यो बन्जी जम्प पुग्न काठमाडौँबाट सडकमार्ग हुँदै ३ देखि ४ घण्टामा पुग्न सकिन्छ । सार्वजनिक यातायात बसमा गए प्रतिव्यक्ति ३८० रुपैयाँ, माइक्रोबसमा जाँदा ४५० रुपैयाँ भाडा लाग्छ ।
त्यस्तै, बन्जी जम्प गर्न टिकटको मूल्य प्रतिव्यक्ति ७ हजार ५०० रुपैयाँ रहेको छ । त्यस्तै, खानाबस्न साधरण होटलमा करिब ३ हजार रुपैयाँ लाग्छ । दुई दिनमा भोटेकोशी पुगेर बन्जीजम्प गरे फर्किन सकिन्छ ।
भारत, चीन र सार्क मुलुकका नागरिकहरूले ९ हजार रुपैयाँ प्रतिव्यक्ती तिनुपर्छ । तेस्रो मुलुकबाट आउने पर्यटकले बन्जी जम्पका लागि ११ हजार रुपैयाँँ तिर्नुपर्छ ।
भोटेकोशीमा गएर ब्रेकफाष्ट, लन्च र बन्जी जम्प सहित प्रतिव्यक्ती लागत ९ हजार रुपैयाँदेखि १२ हजार रुपैयाँसम्मको प्याकेज रहेको छ ।
द लास्ट रिसोर्टले २०५८ देखि भोटेकोशीमा बन्जीजम्प सञ्चालन गर्दै आइरहेको छ । भोटेकोशीमाथि हालिएको झोलुङे पुलबाट करिब १६० मिटर तलको खोँचमा छलाङ मार्न सकिन्छ ।
कुश्मा बन्जी जम्प : विश्वकै दोस्रो अग्लो उचाइ भएको कुश्माको बन्जी जम्प गर्न न्यूनतम २० देखि ३० हजार रुपैयाँसम्म खर्च हुन्छ । निजी क्षेत्र इन्टु द वाइल्ड मल्टी प्रपोज प्रालिको लगानीमा निमार्ण गरिएको यो नेपालकै नमूना बन्जीजम्प हो । ५२० मिटर लम्बाइको पुलमा कुश्मा बन्जीङ जम्पको उचाइ २२८ मिटर उचाइ रहेको छ ।
कम्पनीका अनुसार बन्जी फ्रीफलको समय ४.५ सेकेन्ड र स्विङ फ्रीफलका लागि ८.५ सेकेन्ड समय लाग्छ । बन्जीङ वेट ४० देखि १२० किलोग्राम सम्म हुनुपर्ने छ ।
पर्वतको कुश्मा पुग्न सडकमार्ग र पोखरासम्म हवाईमार्गबाट जान सकिन्छ । काठमाडौंबाट २७४ किलोमिटरको दूरीमा रहेको कुश्मा जान सार्वजनिक गाडीमा करिब ८ घण्टा लाग्छ भने भाडा गाडी आनुसार १२०० देखि २ हजार रुपैयाँसम्म लाग्छ । त्यस्तै, पोखरासम्म जहाजबाट र त्यसपछि बस, जीप लगायत साधनमा जान सकिन्छ ।
कुश्मामा बन्जी गर्न प्रतिव्यक्ति टिकट मूल्य ७ हजार ५०० रहेको छ । फोटो र भिडियोसहित बन्जी जम्प गर्नका लागि प्रतिव्यक्ति ९ हजार रुपैयाँ टिकट मूल्य रहेको छ ।
कुश्मा पुगेर काठमाडौं फर्किन ३ दिन लाग्छ भने २ रात बास बस्नुपर्ने हुन्छ । दुई रात बासबस्न र खानका लागि साधरण होटलमा करिब ६÷७ हजार रुपैयाँ खर्च हुन्छ ।
यस्तै, कुश्मा बन्जीलाई लक्ष्ति गर्दै विभिन्न ट्राभल एजेन्सीहरूले १५ हजारदेखि १७ हजार रुपैयाँका प्याकेज समेत ल्याएका छन् ।
पोखरा बन्जी जम्प : पर्यटकीय सहर पोखराको सेतीखोँचमा अवस्थित बन्जी जम्प गर्न न्यूनतम १५ देखि २५ हजार रुपैयाँसम्म खर्च हुन्छ । हाइग्राउन्ड एड्भेन्चर नेपाल प्रालिले संचालन गरेको यो बन्जी जम्प १०५ मिटर अग्लो छ । बन्जी जम्प गर्न नेपाली नागरिकका लागि टिकटको मूल्य प्रतिव्यक्ति ६ हजार रुपैयाँ रहेको कम्पनीका अध्यक्ष सन्तोष भट्टले बताए । यस्तौ जोडी बन्जीका लागि प्रतिजोडी बन्जीको टिकट १० हजार रुपैयाँ रहेको छ ।
काठमाडौँबाट पोखरा हवाईमार्ग र सडकमार्गबाट पुग्न सकिन्छ । हवाईजहाजमा जाँदा करिब ३० मिनेटमा पुग्न सकिन्छ भने हवाई भाडा एकतर्फी ४ हजार ५०० देखि ६ हजारसम्म लाग्छ । यस्तै, सडकमार्ग हुँदै जाँदा साधरण बस, माइक्रोबसमा एकतर्फी भाडा १ हजार रुपैयाँ र सुविधासम्पन्न डिलक्स बसमा जाँदा १८०० रुपैयाँसम्म भाडा लाग्छ । जहाजमा आवतजावत गरे १० देखि १२ हजार र बसमा आवत जावत गर्दा २ हजारदेखि ३ हजार ५०० रुपैयाँसम्म खर्च हुन्छ ।
यस्तै, काठमाडौंबाट पोखरा बन्जी गर्न जाँदा दुई रात पोखरामा बास बस्नुपर्ने हुन्छ । साधरण होटलमा बसे दुई दिनमा खानबस्न ६÷७ हजार रुपैयाँ खर्च हुन्छ ।
