काठमाडौं । सेयर बजारमा कमब्याक भएको छ । लगातार १२७ अंकको गिरावटपछि नेप्सेले आज ५ अंकले बढेको हो ।
सूचकमा झिनो सुधार आए पनि कारोबार रकममा भने ठूलो गिरावट आएको छ । अघिल्लो दिनको तुलनामा कारोबार रकम ६५ करोडले घटेर १ अर्ब ८५ करोडमा सीमित भएको छ ।
सोमबार नेप्से परिसूचक ५.८४ अंकले बढेर २१०६.१८ विन्दुमा पुगेको छ । यसदिन २६२ कम्पनीको ५५ लाख ३१ हजार ७३७ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये १० समूहको परिसूचक बढेको छ भने ३ को घटेको छ । व्यापार समूहको परिसूचक सबैभन्दा धेरै १.९७ प्रतिशतले बढेको छ ।
आज शिवम् सिमेन्टको सर्वाधिक कारोबार भएको छ । यसको ८ करोड रुपैयाँ बढीको सेयर किनबेच भएको छ ।
बढ्दो बजारमा आज सनराइज ब्लूचिप फण्डका इकाईधनीले सर्वाधिक ७.१० प्रतिशत कमाएका छन् । त्यस्तै, बलेफी हाइड्रोपावर ५.७९, एनआइसी एसिया फ्लेक्स क्याप फण्ड र लक्ष्मी उन्नति कोषको सेयर मूल्य ३ प्रतिशतले बढेको छ ।
