काठमाडौं । सेयर बजारमा लगातार चौथोे दिन गिरावट आएको छ । आइतबार नेपाल राष्ट्र बैंकले मौद्रिक नीति जारी गरेपछि सोमबारदेखि ओरालो लागेको नेप्सले सोही यात्रा कायम राखेको हो । चार दिनमा नेप्सै झन्डै १०० अंकले घटेको छ ।
नेपाल राष्ट्र बैंकले मौद्रिक नीतिमार्फत ५० लाख रुपैयाँसम्मको सेयर कर्जाको मात्र जोखिभार १०० प्रतिशतमा झारेपछि लगानीकर्ता हतोत्साही हुँदा नेप्सेमा लगातार गिरावट आएको हो ।
लगानीकर्ताले सेयर धितोकर्जाको १२ करोडको सीमा हटाउन र जोखिमभार घटाउन माग गरे पनि राष्ट्र बैंकले सुनुवाइ नगर्दा लगानीकर्ताको मनोबल गिरेको हो ।
बिहीबार नेप्से परिसूचक २९.७१ अंकले घटेर २१२६.४८ विन्दुमा आइपुगेको छ । यसदिन २७१ कम्पनीको २ अर्ब ४२ करोड बढीको ६२ लाख ७१ हजार ७७७ कित्ता सेयर किनबेच भएको छ ।
आज कारोबारमा आएका १३ वटै उपसमूहको परिसूचक घटेको छ । व्यापार समूहको परिसूचक सबैभन्दा धेरै २.६५ प्रतिशतले घटेको छ ।
आज शिवम् सिमेन्टको सर्वाधिक कारोबार भएको छ । यसको साढे १० करोड रुपैयाँ बढीको सेयर किनबेच भएको छ ।
दोहोरो अंकले घटेको बजारमा आज किसान लघुवित्तको सेयर मूल्य सबैभन्दा धेरै ८.६८ प्रतिशतले घटेको छ । त्यस्तै, प्रोग्रेसिभ फाइनान्स, माइ खोला हाइड्रोपावर, मिथिला लघुवित्त, वरुण हाइड्रोपावर, ग्रीन डेभलपमेन्ट बैंक र सिटी होटलका सेयरधनीले ४ प्रतिशत गुमाएका छन् ।
