काठमाडौं । सेयर बजारमा झिनो करेक्सन आएको छ । यससाता अघिल्ला ४ दिनमा ७१ अंकले बढेको नेप्सेमा आज १ अंकको करेक्सन आएको हो ।
सूचकसँगै कारोबार रकममा पनि गिरावट आएको छ । अघिल्लो दिनको तुलनामा कारोबार रकम २९ करोड घटेर ३ अर्ब ५ करोडमा रुपैयाँमा सीमित भएको छ ।
बिहीबार नेप्से परिसूचक १.३१ अंकले घटेर २१६३.९२ विन्दुमा आइपुगेको छ । यसदिन २६४ कम्पनीको ८४ लाख २४ हजार १०८ कित्ता सेयर किनबेच भएको छ ।
आज कारोबारमा आएका १३ वटा उपसमूह मध्ये ५उपसमूहको परिसूचक बढेको छ भने ८ को घटेको छ । व्यापार समूहको परिसूचक सबैभन्दा धेरै ६.३५ प्रतिशतले बढेको छ ।
आज शिवम् सिमेन्टको सर्वाधिक कारोबार भएको छ । यसको १४ करोड रुपैयाँ बढीको सेयर किनबेच भएको छ । त्यस्तै, सोल्टी होटल ९ करोड र हिमालयन इन्स्योरेन्सको पौने ९ करोडको कारोबार हुँदै शीर्ष तीनमा रहे ।
घट्दो बजारमा आज दुई कम्पनीको सेयर मूल्यमा पोजेटिभ सर्किट लागेको छ । विशाल बजार र लिबर्टी इनर्जीका सेयरधनीले ठ्याक्कै १० प्रतिशत कमाएका छन् ।
