काठमाडौं । सेयर बजारमा लगातार उच्च अंकको गिरावट आएको छ । गत बुधबार ३५ अंकले घटेको नेप्से आज एकैदिन ५३ अंकले घटेको छ । पछिल्ला दुई दिनमै नेप्से ८८ अंकले घटेको छ ।
प्रफिट बुक गर्ने हाबी हुँदा नेप्सेमा गिरावट आएको आकलन गरिएको छ । सूचकमा भारी गिरावट आए पनि कारोबार रकम भने उत्साहजनक नै रहेको छ । आज ५ अर्ब ८ करोड बढीको सेयर कारोबार भएको छ ।
आइतबार नेप्से परिसूचक ५३.७० अंकले घटेर २०९७.२९ विन्दुमा आइपुगेको छ । यसदिन २८६ कम्पनीको १ करोड १३ लाख २३ हजार १८३ कित्ता सेयर किनबेच भएको छ ।
आज कारोबारमा आएका १३ वटै उपसमूहको परिसूचक राताम्मे भएको छ । माइक्रोफाइनान्स उपसमूह सबैभन्दा धेरै ४.७५ प्रतिशतले घटेको छ ।
आज हिमालयन लाइफको सर्वाधिक कारोबार भएको छ । यसको साढे ४२ करोड रुपैयाँ बढीको सेयर किनबेच भएको छ । त्यस्तै, शिवम् सिमेन्टको २७ करोड र सोल्टी होटल २० करोड बढीको कारोबार हुँदै शीर्ष तीनमा रहे ।
उच्च अंकले घटेको बजारमा पनि आज २ कम्पनीको सेयर मूल्यमा पोजेटिभ सर्किट लागेको छ ।बीपीडब्ल्यू लघुवित्त र सिटी होटलको सेयर मूल्य १० प्रतिशतले बढेको छ ।
घट्दो बजारमा आज श्रृजनशील लघुवित्तका सेयरधनीले सर्वाधिक ९.३२ प्रतिशत गुमाएका छन् । त्यसैगरी, माउन्टेन इनर्जी ९.१२, ग्रामीण विकास लघुवित्त ८.०१, साधना लघुवित्त, गुराँस लघुवित्त, आशा लघुवित्त र हिमालयन हाइड्रोपावरको सेयर मूल्य ७ प्रतिशतभन्दा धेरैले घटेको छ ।
