काठमाडौं । सेयर बजारले कमब्याक गरेको छ । सोमबारदेखि लगातार ओरालो लागेको नेप्से ४३ अंकको गिरावटपछि आज झिनो अंकले बढेको हो ।
सूचकमा सुधार आए पनि आज कारोबार रकममा भने गिरावट आएको छ । अघिल्लो दिनको तुलनामा कारोबार रकम ५ करोडले घटेर ३ अर्ब ४४ करोड रुपैयाँमा सीमित भएको छ ।
बिहीबार नेप्से परिसूचक ४.७५ अंकले बढेर २०५५.५३ विन्दुमा पुगेको छ । यसदिन २७६ कम्पनीको ८० लाख ८ हजार २४६ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये ४ उपसमूहको परिसूचक बढेको छ भने ९ को घटेको छ । आज होटल समूहको सेयरमा उच्च आकर्षण देखिएको छ । यस समूहको परिसूचक सबैभन्दा धेरै ८.६५ प्रतिशतले बढेको छ ।
आज सोल्टी होटलको सर्वाधिक कारोबार भएको छ । यसको साढे २९ करोड रुपैयाँ बढीको सेयर किनबेच भएको छ । त्यस्तै, हिमालयन डिस्ट्रीलरी १५ करोड र शिवम् सिमेन्ट १४ करोड बढीको कारोबार हुँदै शीर्ष तीनमा रहे ।
सामानय अंक्ले बढेको बजारमा आज आधादर्जन कम्पनीको सेयर मूल्यमा पोजेटिभ सर्किट लागेको छ । तारागाउँ होटल, ओरेन्टल होटल, कालिञ्चोक दर्शन र बीपीडब्ल्यू लघुवित्तको सेयर मूल्य ठ्याक्कै १० प्रतिशतले बढेको छ ।
त्यसैगरी, सिटी होटल र हिमालयन लाइफ इन्स्योरेन्सका सेयरधनीले पनि १० प्रतिशत कमाएका छन् ।
