काठमाडौं । प्रतिनिधिसभा अन्तर्गतको अर्थ समितिले नयाँ स्टक ब्रोकर (धितोपत्र दलाल)को लाइसेन्स प्रक्रिया अघि बढाउन निर्देशन दिएको छ ।
मंगलबार नेपाल धितोपत्र बोर्डका पदाधिकारीहरुसँग छलफलपछि अर्थ समितिले विधि र प्रक्रिया पुर्याएर लाइसेन्स प्रक्रिया अघि बढाउन अर्थ मन्त्रालय, नेपाल धितोपत्र बोर्ड र नेपाल स्टक एक्सचेञ्जलाई निर्देशन दिएको हो ।
यसअघि जेठ २९ मा बसेको बसेको समितिको बैठकले तत्काललाई स्टक ब्रोकर र स्टक एक्सचेन्जको लाइसेन्सको प्रक्रिया रोक्न निर्देशन दिएको थियो ।
साथै, समितिले बोर्डका पदाधिकारीहरुलाई छलफलमा समेत बोलाएको थियो । मंगलबार बोर्ड अध्यक्ष रकेश कुमार हमालसहित भएको छलफलपछि अर्थ समिति यसअघिको आफ्नै निर्णयबाट पछि हट्दै लाइसेन्स प्रक्रिया अघि बढाउन निर्देशन दिएको हो ।
अर्थ समितिले जेठ ७ गते धितोपत्र बोर्डलाई पत्र लेख्दै नयाँ स्टक र ब्रोकर लाइसेन्स वितरण तथा अर्थ समितिले तयार पारेको सुझाव प्रतिवेदन कार्यान्वयनको अवस्थाबारे जानकारी मागेको थियो ।
धितोपत्र बोर्डले अर्थसमितिलाई जेठ १२ गते जवाफ पठाए पनि बोर्डलाई बैठकमा बोलाएरै जवाफ लिनुपर्नेमा सांसदहरूले बताएका थिए । साेही अनुसार आज बोर्ड अध्यक्ष हमाल आफैं समितिको बैठकमा गएका थिए ।
धितोपत्र बोर्डले जेठ ८ गते सात र जेठ २२ गते ११ गरी १८ वटा कम्पनीलाई धितोपत्र व्यापारी र ब्रोकर लाइसेन्ससमेत दिइसकेको छ । यसरी लाइसेन्स पाइसकेका कम्पनीले न्यूनतम मापदण्ड पूरा गरे/नगरेको बारे अनुसन्धान गर्न आवश्यक रहेको भन्दै अर्थ समितिले प्रक्रिया रोक्न निर्देशन दिएको थियो ।
