काठमाडौं । आत्मनिर्भर लघुवित्त वित्तीय संस्था सबैभन्दा महँगोे सेयर मूल्य हुने लघुवित्त कम्पनी बनेको हो ।
गत वैशाख १९ गतेदेखि कारोबारमा आएको आत्मनिर्भरले नेष्डो लघुवित्तलाई उछिन्दै सबैभन्दा धेरै सेयर मूल्य हुने लघुवित्त बनेको हो ।
कारोबारमा आएको यता लगातार १५ दिन पोजेटिभ सर्किट लागेको लघुवित्तको सेयर मूल्यमा गत साता केही करेक्शन आएको थियो । तर, आज लघुवित्तको सेयर मूल्यमा पोजेटिभ सर्किट अर्थात् १० प्रतिशतले बढ्दै प्रतिकित्ता भाउ २३४३ रुपैयाँ पुगेको छ ।
यो नेप्सेमा सूचीकृत ५९ लघुवित्तमध्ये सबैभन्दा धेरै सेयर मूल्य हो । यसअघि नेष्डोको सेयर मूल्य सबैभन्दा धेरै प्रतिकित्ता २०९५ रुपैयाँ रहेको थियो ।
हाल ६ करोड २३ लाख ३८० रुपैयाँ चुक्ता पूँजी रहेको लघुवित्तको नेप्सेमा सर्वसाधरणतर्फको २ लाख ३ हजार ३८० कित्ता मात्र सेयर सूचीकृत छ । तुलनात्मक रुपमा वित्तीय अवस्था बलियो रहेको र सेयर संख्या न्यून रहेकाले लघुवित्तको सेयर मूल्य आकाशिएएको हो ।
