काठमाडौं । काठमाडौं–तराई/मधेश द्रुतमार्ग (फाष्ट ट्रयाक)को डिजाइन पुनरावलोकन गरिने भएको छ । फास्ट ट्रयाकमा थप ३ वटा सुरुङमार्ग बनाउन प्रस्ताव गरिएसँगै डिजाइनमा केही परिवर्तन हुने भएको हो ।
फास्ट ट्रयाक निर्माण गरिरहेको नेपाली सेनाले धेरै पहिरो जाने ३ ठाउँमा सडकको सट्टा सुरुङमार्ग बनाउन प्रस्ताव गरेको छ । सोसँगै ती ठाउँको डिजाइन परिवर्तन हुने भएको हो ।
नेपाली सेनाका प्रवक्ता कृष्णप्रसाद भण्डारीले आयोजनामा थप ३ वटा सुरुङ बनाउनुपर्ने देखिएपछि डिजाइन पुनरालोकन गर्नुपर्ने भएको बताए । प्याकेज नं. १० अन्तर्गतको सडकको डिजाइन पुनरावलोकन गरिने उनले बताए ।
आयोजनाको डिजाइन पुनरावलोकनका लागि सरकारसँग छलफल भइरहेको उनले बताए । स्थान र निर्माण गर्ने विषय टुंगो लागेपछि मात्र थप सुरुङ निर्माणको प्रकृया अघि बढ्ने उनले बताए ।
‘फास्ट ट्रयाकमा थप सुरुङ बनाउनु पर्ने देखिएको छ । त्यसका लागि डिजनाइन पुनरालोकन गर्नुपर्ने हुन्छ, सबै होइन १० नम्बर प्याकेजमा मात्र डिजाइन पुनरालोकन गर्न लागिएको हो, त्यसका लागि छलफल भइरहेको छ,’ भण्डारीले चाणक्य पोष्टसँग भने ।
उनका अनुसार २.२ किलोमिटरको ३ वटा नयाँ सुरुङमार्ग थप हुने भएको हो । जसमा एउटा ३०० मिटर, ९०० मिटर र १ किलोमिटर गरेर २.२ किलोमिटरको बन्ने उनले बताए ।
सुरुङमार्ग मात्रै साढे ८ किलोमिटर हुने
हाल फास्ट ट्रयाकमा ३ वटा सुरुङमार्ग निर्माण भइरहेका छन् । प्रस्तावित ३ सुरुङ बनेमा सुरुङमार्गको संख्या ६ वटा पुग्नेछ । सुरुङमार्गको कुल लम्बाइ ८.६ किलोमिटर पुग्नेछ ।
हाल आयोजना अन्तर्गत ६.४ किलोमिटरको ३ वटा सुरुङमार्ग निर्माण भइरहेको छ । मकवानपुरको महादेवडाँडामा ३.३५५ किलोमिटर, धेद्रेमा १.६३० किलोमिटर र लेनडाँडामा १.४३० किलोमिटर सुरुङ खन्ने काम भइरहेको छ ।
महादेवडाँडामा हालसम्म ४३८ मिटर सुरुङ खनिसकिएको सेनाले जनाएको छ । यसको ठेक्का चाइना स्टेट कन्स्ट्रक्सन इन्जिनियरिङ कम्पनीले २१ अर्ब ६१ करोड रुपैयाँमा पाएको छ ।
त्यस्तै, धेद्रेमा १.६३० किलोमिटर र लेनडाँडामा १.४३० किलोमिटर सुरुङ खन्न चाइनिज निर्माण कम्पनी पोली च्याङ्दाले ठेक्का पाएको छ । यी दुई सुरुङको लागत २८ अर्ब ५३ करोड रुपैयाँ रहेको छ ।
एकचौथाई काम सकियो
आयोजनाको हालसम्म करिब एकचौथाई काम सकिएको छ । आर्थिक् वर्ष २०७४/७५ देखि निर्माण सुरु गरिएको यस आयोजनाको वैशाख मसान्तसम्म २६ प्रतिशत भौतिक प्रगति भएको छ ।
२०८१ भित्र निर्माण सम्पन्न गर्नुपर्ने भए पनि तोकिएकै सममा काम सम्पन्न नहुने भएपछि हालै म्याद थपिएको छ । थपिएको म्याद अनुसार अब २०८३ सम्म सम्पन्न गर्नुपर्नेछ ।
७२ किलोमिटर लामो यस सडकमा करिब १० किमी लम्बाइ बराबरका ८७ पुल रहने छ । जसमा स्पेसल ब्रिज १६ वटा, मेजर र मिडियम ब्रिज ४९ वटा र माइनर ब्रिज २२ वटा रहेका छन् ।
८७ पुलमध्ये हालसम्म ४५ वटा पुलको ठेक्का प्रकृया पूरा भई निर्माण सुरु गरिसकिएको प्रवक्ता भण्डारीले बताए । बाँकी ४२ वटा पुल विभिन्न प्याकेजमा समावेस गरेर ठेक्का हुने प्रकृयामा रहेको उनले बताए ।
आयोजनाको संशोधित अनुमानित लागत १ खर्ब ७५ अर्ब रुपैयाँ रहेको छ । आगामी आर्थिक वर्षमा फाष्ट ट्रयाकका २२ अर्ब ५० करोड रुपैयाँ बजेट विनियोजन गरिएको छ । चालु आर्थिक वर्षमा यस आयोजनालाई ३० अर्ब ७ करोड रुपैयाँ बजेट विनियोजन गरिएको थियो । आयोजनामा चालु आवभित्र १२ अर्ब रुपैयाँ खर्च हुने आयोजनाले जनाएको छ ।
