काठमाडौं । सरकार र आन्दोलनरत सेयर लगानीकर्ता बीच सेयर कारोबारमा पूँजीगत लाभ कर नै अन्तिम कर हुने सहमति भएको छ ।
आइतबार अर्थमन्त्रालयमा अर्थमन्त्री डा. प्रकाशशरण महतको उपस्थितिमा सरकारी अधिकारी र लगानीकर्ता बीच भएको वार्तामा यस्तो सहमति जुटेको हो ।
सहमति अनुसार सेयर कारोबारमा हालको ५ र ७.५ प्रतिशत पूँजीगत लाभ कर नै अन्तिम कर कायम गर्ने भइएको हो ।
सरकारले आर्थिक विधेयकमार्फत सेयर कारोबारीले ५० लाख बढी नाफा कमाए आयकरसमेत तिर्नुपर्ने व्यवस्था गरेको थियो । त्यसको विधरोधमा लगानीकर्ता ४ दिनदेखि आन्दोलित भएका थिए भने आज सबै ब्रोकर कार्यालयमा तालाबन्दी गरेका थिए ।
लगानीकर्ताको तालाबन्दीका कारण आज सेयर कारोबार समेत बन्द भएको थियो । वार्ता मिलेसँगै अब बन्द सेयर कारोबार खुल्ने भएको छ।
