काठमाडौं । सेयर लगानीकर्ताले ब्रोकर कार्यालयहरूमा तालाबन्दी गरेपछि आज सेयर कारोबार प्रभावित भएको छ ।
४ दिनदेखि आन्दोलनरत लगानीकर्ताले आगामी आर्थिक वर्षको आर्थिक विद्येयक संसोधन नभएसम्म सेयर कारोबार नगर्न चेतावनी दिँदै सबै ब्रोकर कार्यालयहरूमा तालाबन्दी गरेपछि सेयर कारोबार रोकिएको हो ।
नियमित समय ११ बजेदेखि सेयर कारोबार हुनुपर्ने भए पनि लगानीकर्ताले ब्रोकरमा तालाबन्दी गरेपछि अनलाइन प्रणाली टीएमएसबाट समेत कारोबार गर्न नमिल्ने बनाइएको छ ।
सरकारले आर्थिक विधेयकमार्फत सेयर कारोबार गरी ५० लाख बढी कमाउनेले पूँजीगत लाभकरसहित आयकर पनि बुझाउनुपर्ने व्यवस्था गरेपछि लगानीकर्ता आन्दोलित भएका छन् । हाल सेयरकारोबारीले पूँजीगत लाभकर ५ र ७.५ प्रतिशत मात्रै कर तिर्दै आएका थिए ।
सरकारले त्यसका साथै आयकर पनि तिर्नुपर्ने व्यवस्था गरेपछि लगानीकर्ता आक्रोसित हुँदै आन्दोलनमा उत्रेका हुन् । हाल तिर्दै आएको पूँजीगत लाभकर अन्तिम कर हो/होइन भन्नेमा स्पष्ट नपारेसम्म लगानीकर्ताले आन्दोलन नरोक्ने बताएका छन् ।
आन्दोलनकै दौरान सेयर लगानीकर्ता आज बिहान अर्थमन्त्रीको घर घेर्न समेत पुगेका थिए । अहिले लगानीकर्ता र सरकार बीच अर्थमन्त्रालयमा वार्ता भइरहेको छ ।
