काठमाडौं । सेयर बजारले कमब्याक गरेको छ । यस साता अघिल्ला ३ कारोबार दिनमै ११० अंकले घटेको नेप्से आज दोहोरो अंकले कमब्याक गरेको हो ।
सरकारले आगामी आर्थिक वर्षको बजेटमा यसअघि एफपीओ तथा मर्जरबाट प्राप्त लाभको कर र व्यक्तिगत कारोबारमा पनि आयकार तिर्नुपर्ने व्यवस्था गरेपछि नेप्सेमा उच्च गिरावट आएको थियो ।
आन्तरिक राजस्व विभागले नियमित नभई पटकले कारोबार गर्नेले पूँजीगत लाभकर मात्रै तिर्नुपर्ने स्पष्ट पारेसँगै लगानीकर्ता सम्हालिँदा नेप्सेमा सुधार आएको हो ।
सूचकमा सुधार आए पनि आज कारोबार रकममा भने गिरावट आएको छ । अघिल्लो दिनको तुलनामा कारोबार रकम ६६ करोडले घटेर १ अर्ब ६५ करोडमा सीमित भएको छ ।
बिहीबार नेप्से परिसूचक १६.५४ अंकले बढेर १८६४.३६ विन्दुमा पुगेको छ । यसदिन २७२ कम्पनीको ६१ लाख २८ हजार ६२१ कित्ता सेयर किनबेच भएको छ ।
आज कारोबारमा आएका १३ वटै उपसमूहको परिसूचक बढेको छ । निर्जीवन बीमा उपसमूहको परिसूचक सबैभन्दा धेरै १.९३ प्रतिशतले बढेको छ ।
आज प्रभु बैंकको प्रमोटर सेयर सर्वाधिक कारोबार भएको छ । यसको २१ करोड रुपैयाँ बढीको सेयर किनबेच भएको छ । त्यस्तै, शिवम् सिमेन्टको ११ करोड बढीको कारोबरा भएको छ ।
दोहोरो अंकले बढेको बजारमा जोशी हाइड्रोपावरका लगानीकर्ताले सर्वाधिक ६.९४ प्रतिशत कमाएका छन् । त्यस्तै, बीपीडब्ल्यू लघुवित्त ६.०८, एशिया हाइड्रोपावर ५.०७, पाँचथर पावर ५.०६, नेरुडे लघुवित्त र ग्रीन डेभलपमेन्ट बैंकको सेयरमूल्य साढे ४ प्रतिशतले बढेको छ ।
