काठमाडौं । हालसम्म संघीय सरकारबाट निर्माण भएको राष्ट्रियस्तरकाे सडक सञ्जाल ३४ हजार किलोमिटर पुगेको छ ।
सरकारले सार्वजनिक गरेको आर्थिक सर्वेक्षण अनुसार चालु आर्थिक वर्षको फागुन मसान्तसम्म केन्द्रीय सरकारले बनाएको सडक ३४ हजार १०० किलोमिटर पुगेको हो ।
कुल सडकमध्ये १७ हजार ४८० किलोमिटर कालोपत्र, ७ हजार ९५६ किलोमिटर ग्राबेल र ८ हजार ६६४ किलोमिटर कच्ची रहेको छ ।
चालु आवमा जम्मा २४८ किलोमिटर सडक मात्र कालोपत्र भएको छ भने १०४ किलोमिटर नयाँ सडक निर्माण भएको छ । त्यस्तै, ३१६ किलोमिटर सडक ग्रावेल गरिएको सर्वेक्षणमा उल्लेख छ ।
पछिल्लो ५ वर्षमा कुल ४ हजार १२ किलोमिटर नयाँ सडक बनेको छ । आर्थिक वर्ष २०७४/७५ सम्म संघीय सरकारले बनाएको कुल सडक ३० हजार ८८ किलोमिटर रहेकोमा चालु आवको फागुनसम्म ३४ हजार १०० किमी पुगेको हो ।
