काठमाडौं । नेपालमै पहिलोपटक बन्न लागेका दुई फ्लाइओभर निर्माण धमाधम भइरहेको छ । नागढुंगा–नौबिसे सुरूङमार्ग आयोजनाको प्रवेशद्धार बलम्बु र ललितपुरको ग्वार्कोमा फ्लाइओभर निर्माणले गति लिएको हो ।
मुआब्जा विवादका कारण लामो समय रोकिएको बलम्बु फ्लाइओभर निर्माणले अहिले गति लिन थालेको हो । नागढुंगा सुरूङमार्ग आयोजनाका प्रवक्ता रमेश कोइरालाले फ्लाइओभर निर्माण धमाधम भइरहेको बताए ।
उनका अनुसार फ्लाइओभरका सबस्ट्रक्चर र फाउन्डेसन बनाउने काम धमाधम भइरहेको बताए । हालसम्म ३ वटा फाउन्डेसन र २ वटा सबस्ट्रक्चर निर्माण भइसकेको उनले जानकारी दिए ।
आयोजना भित्र ५ वटा सबस्ट्रक्चर बनाउनु पर्नेमा हालसम्म २ वटा मात्र पूरा भएको उनले बताए । साथै, बक्स कल्भर्ट, ओभरपास लगायत पूर्वाधार निर्माणको काम गरिरहेको छ ।
‘फ्लाइ ओभर निर्माणको काम भइरहेको छ, फाउन्डेसन र सबस्ट्रक्चर निर्माण गर्ने कामलाई गति दिएका छौँ,’ उनले भने । ८ महिना भित्र फ्लाइओभर निर्माण सम्पन्न गर्नेगरी काम सुरू गरिसकेको प्रवक्ता कोइरालाले बताए ।
दुई लेनको फ्लाइओभर १२८ मिटर लामो हुने छ । एउटा लेन ३.५ मिटरको हुनेछ । १२८ मिटर फ्लाइओभरबाट करिब ३ किमी पहुँच (एक्सेस) सडकमार्फत काठमाडौंतिरको पोर्टलमा पुग्न सकिन्छ ।
नागढुंगा–नौबिसे सुरूङमार्गको मुख्य ठेकेदार कम्पनी हाज्मा–आन्दो कर्पोरेशन लिमिटेडले नै बलम्बुको फ्लाइओभर निर्माण गरिरहेको छ । नागढुंगा–नौबिसे सुरूङमार्ग जान र सुरूङमार्गबाट काठमाडौं आउनको लागि यो फ्लाइओभरको प्रयोग गरिने छ ।
ग्वार्को फ्लाइओभर
गत फागुनदेखि निर्माण थालिएको ग्वार्को फ्लाइओभरको काम पनि धमाधम भइरहेको छ । यस फ्लाइओभर निर्माण अन्तर्गत अहिले पहिलो चरणका कामहरू भइरहेका छन् ।
सडक विभाग अन्तर्गतको गुणस्तर, अनुसन्धान तथा विकास केन्द्रका इन्जिनीयर रबेन्द्र श्रेष्ठले ग्वार्को फ्लाइओभरको फाउन्डेसन निर्माणका लागि खाल्डो खनेर माटो निकाल्ने काम भइरहेको बताए ।
१४ महिनाभित्र काम सक्ने लक्ष्य रहेको यस आयोजनाको अन्य कामहरू पनि भइरहेको उनले बताए । कोटेश्वर–कलंकी ८ लिन सडकको दायाँबायाँको लेनबाट सवारी आवतजावत गर्ने व्यवस्था गरी बीचको लेनमा माटो निकाल्ने काम भइरहेको छ ।
ट्राफिक व्यवस्थापनका लागि वैकल्पिक डाइभर्सनको व्यवस्था गरिएको छ । यो फ्लाइओभर १७ करोड ६८ लाख ८८ हजार ८ सय ८ रुपैयाँ लागतमा निर्माण सम्पन्न गर्नेगरी एम/एस आशिष–समानान्तर जेभीले ठेक्का पाएको छ ।
फ्लाइओभर इन्जिनियरिङ प्रोक्युरमेन्ट कन्स्ट्रक्सन (ईपीसी) मोडलमा निर्माण भइरहेको छ । काम सुरू भएको २ वर्षमा निर्माण सक्ने गरी निर्माण भइरहेको छ । ४५५ मिटर लम्बाइ हुने गरी फ्लाइओभर चक्रपथको बीचमा रहेको ४ लेनमा समानान्तर भएर निर्माण हुनेछ ।
