काठमाडौं । बर्दिया सदरमुकाम गुलरिया र बारबर्दिया जोड्ने जब्दीघाटमा नयाँ पुल बन्ने भएको छ । ठेकेदारले गुणस्तरहीन निर्माण सामग्री प्रयोगका कारण उद्घाटन नहुँदै भासिएको उक्त भएको ठाउँबाट ५०० मिटर पर नयाँ पुल बनाउने तयारी गरिएको हो ।
भौतिक पूर्वाधार तथा यातायात मन्त्री प्रकाश ज्वालाले १० दिनभित्र टेन्डर आह्वान गर्ने गरी तयारी भइरहेको बताए । ‘जब्दीघाटको पुल नयाँ ठाउँमा बन्ने छ, पुरानै ठाउँमा भत्काएर बनाउने अवस्था छैन, त्यसलाई अहिले भएको पुल भन्दा ५००/६०० मिटर पर बनाइने छ,’ उनले भने ‘१० दिनभित्र हामी ठेक्का आह्रवान गर्ने छौँ ।’
सडक विभागका महानिर्देशक सुशीलबाबु ढकालले नयाँ पुल निर्माण भएको ३ वर्ष हाराहारीमा पूरा हुने बताए । उनले सार्वजनिक खरिद नियमलाई पालना गरेर ठेक्का लगाउनुपर्ने बताए ।
‘पुरानो पुल उपयोग योग्य छैन । त्यो विषय हाल अदालतमा छ । अदालतले दिएको निर्णय अनुसार त्यो पुल हटाउने कि त्यतिकै छोड्ने भन्ने थाहा हुन्छ,’ महानिर्देशक ढकालले भने ।
२०७४ साउन ३० गते बर्दिया सदरमुकाम गुलरिया र बारबर्दिया जोड्ने जब्दीघाट पुल भत्केको थियो । पुल भत्किएको ६ वर्षपछि भत्कीएको पुल हटाएर नयाँ पुल बनाउन लागिएको हो ।
पुल बनाउन माग गर्दै सांसद सञ्जय गौतम भत्किएकै पुल मुनि अनसनमा बसेका थिए । सो पश्चात सडक विभागका महानिर्देशक सहितको टोली जब्दीघाट पुगेर नयाँ पुल बनाउने निर्णय भएको थियो । यो पुल पप्पु कन्स्ट्रक्सनले साढे १६ करोड बढी लागतमा बनाएको थियो । ४३५ मिटर लामो र ७.४ मिटर चौडा यो पुल उद्घाटन हुनु अघि भत्किएको हो ।
प्राविधिक तथा कर्मचारीको चरम लापरवाहीमा बनेको यो पुल नयाँ ठेक्कामा ‘डिजाइन एण्ड बिल्ट’ मोडलमा बन्न लागेको हो । पुल निर्माणका क्रममा निर्माण सामग्रीहरूको गुणस्तर नियन्त्रण प्रभावकारी नभएको र डिजाइन बमोजिम निर्माण नगरेको कारण लोड थाम्न नसकी पुल भासिएको प्राविधिक परीक्षण तथा विश्लेषणबाट पुष्टि भएको अख्तियारको दाबी थियो ।
मन्त्री ज्वालाले सबै आयोजनालाई गति दिइने बताए । उनले आयोजनाको प्रकृति हेरेर आवश्यक्ता अनुसार बजेट विनियोजन गरी निर्माणलाई निरन्तरता दिने बताए ।
