काठमाडौं । सङ्खुवासभाको तुम्लिङटार विमानस्थलमा पहिलो पटक ७२ सिटे जहाजले उडान गरेको छ । विमानस्थलको स्तरोन्नति भएसँगै मङ्गलबार बुद्धको एयरको एटीआर-७२ विमानले उडान भरेको हो ।
परीक्षण उडान सफल भएको १ वर्षपछि बुद्धले तुम्लिङटार विमानस्थलमा ७२ सिटे जहाजले नियमित उडान सुरु गरेको हो । यसअघि सो विमानस्थलमा बुद्धले एटीआर-४२ विमानबाट व्यावसायिक उडान गर्दै आएको थियो ।
बुद्धले सो विमानस्थलमा गत वर्ष जेठ २१ मा पहिलोपटक एटीआर ७२ जहाजबाट परीक्षण उडान गरेको थियो । नागरिक उड्डयनको कार्यालय तुम्लिङटारका अनुसार अब बुद्धले सो विमानस्थलबाट दैनिक नियमित उडान गर्नेछ ।
तुम्लिङटारमा विमानस्थलमा वि.सं.२०२९ सालदेखि हवाई उडान सुरु भएको थियो । सुरुमा १९ सिटे ट्वीनअटर जहाजबाट उडान हुने उक्त विमानस्थल स्तरोन्नति गरिएसँगै अहिले ठूला जहाजले उडान भर्नसक्ने भएका हुन् ।
विमानस्थलको धावनमार्गको लम्बाइ १ हजार ४२० मिटर रहेको छ ।
