काठमाडौं । सेयर बजारको ओरालो यात्रा कायमै रहेको छ । यस साता मंगलबार बाहेक अरु सबै दिन नेप्से घटेको छ । समग्रमा यससाता नेप्से ३० अंकले घटेको छ ।
पछिल्लो समय तरलता सहज र ब्याजदर घटे पनि नीतिगत सुधार नहुँदा लगानीकर्ताको मनोवल बढ्न सकेको छैन । जसकारण बजारले अझै गति नसकेको हो ।
आज सूचकसँगै कारोबार रकममा पनि गिरावट आएको छ । अघिल्लो दिनको तुलनामा कारोबार रकम १ करोडले घटेर ५७ करोड रुपैयाँमा सीमित भएको छ । यो पछिल्लो ८ महिना यताकै कम कारोबार हो ।
बिहीबार २५९ कम्पनीको २१ लाख ५ हजार ६५७ कित्ता सेयर किनबेच भएको छ । आज कारोबारमा आएका १३ वटा उपसमूह मध्ये १० उपसमूहको परिसूचक घटेको छ भने ३ को बढेको छ । फाइनान्स उपसमूहको परिसूचक सबैभन्दा धेरै ०.६७ प्रतिशतले घटेको छ ।
आज नेपाल टेलिकमको सर्वाधिक कारोबार भएको छ । यसको ३ करोड रुपैयाँ बढीको सेयर किनबेच भएको छ । त्यस्तै, ग्लोबल आइएमई बैंकको प्रमोटर सेयर साढे २ करोड र शिवम् सिमेन्ट पौने २ करोडको कारोबार हुँदै शीर्ष तीनमा रहे ।
झिनो अंकले घटेको बजारमा आज आत्मनिर्भर लघुवित्तका सेयरधनीले सबैभन्दा धेरै ६.१० प्रतिशत कमाएका छन् भने फरवार्ड माइक्रोफाइनान्सका सेयरधनीले ५.९९ प्रतिशत गुमाएका छन् ।
