काठमाडौं । हाइड्रो इलेक्ट्रीसिटी इन्भेष्टमेन्ट एण्ड डेभलपमेन्ट कम्पनी लिमिटेड (एचआइडीसीएल)को खुद नाफामा उल्लेख्य वृद्धि भएको छ ।
कम्पनीले बिहीबार सार्वजनिक गरेको चालु आर्थिक वर्षको तेस्रो त्रैमासको अपरिष्कृत वित्तीय विवरण अनुसार खुद नाफा ४५.१६ प्रतिशतले बढेको छ ।
कम्पनीले चैत मसान्तसम्म १ अर्ब १ करोड रुपैयाँ खुद नाफा कमाएको छ। यो गत आर्थिक वर्षको सोही अवधिको तुलनामा ३१ करोड बढी हो । कम्पनीले गत वर्षको चैतसम्म ६९ करोड ६१ लाख रुपैयाँ खुद नाफा कमाएको थियो ।
निक्षेपको ब्याजदर बढेका कारण कम्पनीको वित्तीय आम्दानी बढ्दा खुद नाफामा उल्लेख्य सुधार आएको हो । समीक्षा अवधिमा कम्पनीको वित्तीय आम्दानी ४४.७० प्रतिशतले बढेर १ अर्ब ५६ करोड पुगेको छ । त्यस्तै, समीक्षा अवधिमा कम्पनीको लाभांश आम्दानी भने ५.५७ प्रतिशतले घटेर १ करोड ३३ लाख रुपैयाँमा सीमित भएको छ ।
हाल २१ अर्ब ७१ करोड रुपैयाँ चुक्ता पूँजी रहेको कम्पनीको रिजर्भ कोषमा २ अर्ब ६६ करोड रुपैयाँ संचित छ । कम्पनीले चैत मसान्तसम्ममा जलविद्युत परियोजनामा ८ अर्ब ७२ करोड ऋण लगानी गरेको छ ।
त्यस्तै, स्वपूँजी लगानी अन्तर्गत सहायक कम्पनी तथा सार्वजनिक एवम् निजी क्षेत्रबाट प्रबद्र्धित जलविद्युत परियोजनाहरुमा ३ अर्ब १३ करोड लगानी गरेको छ भने विभिन्न कम्पनीमा ४१ करोड ५९ लाख रुपैयाँ थप सेयर लगानी गरेको छ।
नाफा बढेसँगै कम्पनीको प्रतिसेयर आम्दानी पनि बढेको छ । समीक्षा अवधिमा प्रतिसेयर आम्दानी ४.९६ रुपैयाँबाट बढेर ६.२१ रुपैयाँ पुगेको छ । कम्पनीको प्रतिसेयर नेटवर्थ १०७.०२ रुपैयाँ र मूल्य आम्दानी अनुपात ३१.४२ गुणा छ।
