काठमाडौं । गौतमबुद्ध (भैरहवा) अन्तर्राष्ट्रिय विमानस्थल संचालनमा आएको १ वर्ष भए पनि अझै एउटा बाहेक विदेशी एयरलायन्स कम्पनी आउन सकेका छैनन् ।
२०७९ जेठ २ देखि व्यावासायिक उडान थालेको नेपालको दोस्रो अन्तर्राष्ट्रिय गौतमबुद्ध विमानस्थलमामा उडान गर्ने कम्पनीलाई सरकारले विभिन्न छुट दिए पनि जजिरा बाहेक अन्य एयरलाइन्सले उडान गर्न चासो नदेखाएका हुन् ।
हाल सो विमानस्थलमा कुवेतकोे जजिरा एयरवेजले अन्तर्राष्ट्रिय उडान गर्दै आएको छ । नेपाल नागरिक उड्डयन प्राधिकरण (क्यान)ले गौतम बुद्ध एयरलाइन्समा ग्राउन्ड ह्याण्डलिङ लगायत विभिन्न सेवामा छुट दिएको छ । तर, यात्रु अभाव, सिधा हवाई रुट नहुँदा विदेशी एयरलाइन्सले चासो नदिएका हुन् ।
केही महिना अघि भैरहवा विमानस्थलबाट विज एयरवेज, थाइल्याण्डको थाई स्माइल लगायतले उडान गर्न चासो देखाए पनि अझै उडान सुरू गरेका छैनन् ।
उक्त विमानस्थलमा व्यवसायिक अन्तर्राष्ट्रिय उडानका लागि विदेशी एयरलाइन्सहरूलाई आकर्षित गर्न विभिन्न छुट सुविधा दिइएको विमानस्थलका सूचना अधिकारी विनोदसिहं रावतले बताए ।
अन्तर्राष्ट्रिय उडानका लागि विमानस्थलले ल्याण्डिङ, पार्किङ, प्यासेजन, फुड, सर्भिलेन्स सबैमा छुटको व्यवस्था गरेको उनले बताए । नेपाल सरकारले नै उडानको लागि भनेर छुटको व्यवस्था गरे पनि अन्तर्राष्ट्रिय उडानका लागि कुनै वायुसेवा व्यवसायी आउन इच्छुक देखिएको छैन । सरकारले यही जेठ २ गते समाप्त भएको उक्त छुटको व्यवस्थालाई २०८१ जेठ २ गतेसम्मका लागि निरन्तरता दिएको छ ।
आन्तरिक उडान पनि घट्यो
सूचना अधिकारी रावतका अनुसार हाल आन्तरिक उडानमा केही कमी आएको छ । यात्रुको संख्या कमी आएका कारण उडानको संख्या समेत घटाइएको उनले जानकारी दिए । सुरूका दिनहरूमा दैनिक २० देखि २५ वटासम्म उडान गरेको भए पनि हाल घटेर ११/१२ मा झरेको उनले बताए ।
‘पहिला धेरैमा २० देखि २५ वटा उडान गरिँदै आएको थियो । अहिले मुस्किलले ११/१२ वटा उडान भइरहेको छ,’ रावतले चाणक्य पोष्टसँग भने ‘अन्तर्राष्ट्रिय उडान त झन सुरू नै भएको छैन । अहिलेसम्म कुनै हवाई कम्पनीले यसमा चासो देखाएका छैनन् ।’
उनले अन्तर्राष्ट्रिय उडान नभएका कारण नाफामा जान नसकेको बताए । विमानस्थलको अप्रेसन खर्च उडान भए पनि नभए पनि तिर्नुपर्ने भएकाले खासै नाफामा नभएको उनको भनाइ छ ।
‘प्लेन चलेकै छैन नाफामूलक भन्न सकिँदैन । अप्रेसनको खर्च यात्रु आए पनि नआए पनि उति नै हो,’ उनले भने । उनले कोभिडपछि विश्व बजारको अर्थतन्त्र संकट ग्रस्त भएकाले पर्यटक नहुँदा उडान हुन नसकेको बताए ।
नागरिक उड्डयन प्राधिकरणका प्रवक्ता जगन्नाथ निरौलाले भने गौतम बुद्ध अन्तराष्ट्रिय विमानस्थल नाफामा रहेको दाबी गरेका छन् । उनले विमानस्थलले वार्षिक ५० करोड रुपैयाँ आय गर्ने अनुमान गरिएको जानकारी दिए । हाल विमानस्थलले वार्षिक २० करोड रुपैयाँ आय गरिरहेको उनको दाबी छ ।
उनका अनुसार विमानस्थल भित्र सञ्चालनका क्रममा सरसफाई, बिजुली, पानी लगायतमा वार्षिक डेढ करोड रुपैयाँ हाराहारी खर्च हुँदै आएको छ । कर्मचारी खर्च दरबन्दी नबढाइएका कारण धेरै नरहेको उनले बताए । कर्मचारी खर्च भने केन्द्रबाटै भुक्तानी हुने भएकाले जानकारी नरहेको उनले बताए ।
निगमले भैरहवाबाट अन्तर्राष्ट्रिय उडान गर्ने
नेपाल वायु सेवा निगमले गौतम बुद्ध अन्तर्राष्ट्रिय विमानस्थलबाट अन्तर्राष्ट्रिय उडान सुरू गर्ने भएको छ । यही मे महिनाको तेस्रो साता अर्थात नेपाली जेठको पहिलो साताबाट उडान गर्ने तयारी गरिरहेको निरौलाले बताए ।
नेपाल वायु सेवा निगमले मलेसिया र बेलजियम उडान गर्ने गरी प्रकृया अगाडि बढाएको उनले जानकारी दिए ।
