काठमाडौं । सेयर बजारमा गिरावट आएको छ । गतसाता ३० अंकले घटेको नेप्से यस साता पहिलो कारोबार दिनमै दोहोरो अंकले घटेको हो ।
आइतबार सेयर बजार मापक सूचक नेप्से १८.८० अंकले घटेर १८८५.६० बिन्दुमा आइपुगेको छ । यसदिन २६५ कम्पनीको ८२ करोड रुपैयाँ बढीको २७ लाख ३४ हजार ३०७ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये होटल बाहेक अरु सबै उपसमूहको परिसूचक राताम्मे भएको छ । फाइनान्स समूहको परिसूचक सबैभन्दा धेरै २.०१ प्रतिशतले घटेको छ ।
आज मोलुङ हाइड्रोपावरको सर्वाधिक कारोबार भएको छ । यसको ३ करोड रुपैयाँ बढीको सेयर किनबेच भएको छ । त्यस्तै, शिवम् सिमेन्ट पौने ३ करोड र एनआइसी एशिया बैंक २ करोड बढीको कारोबार हुँदै शीर्ष तीनमा रहे ।
दोहोरो अंकले घटेको बजारमा पनि आज ३ कम्पनीको सेयर मूल्यमा पोजेटिभ सर्किट लागेको छ । कालिञ्चोक दर्शन, आदर्श लघुवित्त र सनराइज ब्लूचिप फण्डको सेयर मूल्य १० प्रतिशतले बढेको छ ।
