काठमाडौं । नेपाल आयल निगमले हवाई इन्धनको मूल्य घटाएसँगै एयरलाइन्सको हवाई भाडा घटेको छ ।
वायुसेवा सञ्चालक सङ्घले आज (चैत २२ गते) देखि लागू हुने गरी इन्धन शुल्क (फ्युल सरचार्ज) घटाइ हवाई भाडा समायोजन गरेको हो ।
निगमले सोमबार हवाई इन्धनको प्रतिलिटर १० रुपैयाँले कटौती गरेको थियो । सोअनुसार काठमाडौँबाट धनगढीको उडानमा सबैभन्दा धेरै ४४० भाडा घटेको छ । यसअघि यो रुटमा यात्रुले हवाई यात्राका लागि मात्र ७ हजार ५१० तिर्नुपर्थ्यो भने अब ७ हजार ७० रुपैयाँ भाडा कायम गरिएको छ ।
काठमाडौँबाट हुने पर्वतीय उडान (माउन्टेन फ्लाइट)को भाडा ३४५ रुपैयाँ घटेर अधिकतम भाडा ५ हजार ४९० रुपैयाँ कायम भएको छ ।
यसैगरी, काठमाडौँ–भद्रपुर रुटमा ३०० रुपैयाँ, विराटनगरमा २४० रुपैयाँ, जनकपुरका लागि १३० रुपैयाँ, पोखराका लागि १५५ रुपैयाँ, भरतपुरका लागि ११० रुपैयाँ, भैरहवाको २०५रुपैयाँ, नेपालगञ्जका लागि १८५ रुपैयाँ र सुर्खेतका लागि ३४५ रुपैयाँ हवाई भाडा घटेको छ ।
