काठमाडौं । सेयर बजारमा दोहोरो अंकको कमब्याक भएको छ । लगातार ७५ अंकको गिरावटपछि आज नेप्से दोहोरो अंकले फर्केको हो ।
सूचकसँगै आज कारोबार रकममा पनि सुधार आएको छ । अघिल्लो दिनको तुलनामा कारोबार रकम २६ करोडले बढेर सवा १ अर्ब नाघेको छ ।
सोमबार सेयर बजार मापक सूचक नेप्से २२.६५ अंकले बढेर १९४९.०६ बिन्दुमा पुगेको छ । यसदिन २५८ कम्पनीको १ अर्ब २९ करोड रुपैयाँ बढीको ५२ लाख ५५ हजार ८६ कित्ता सेयर किनबेच भएको छ ।
आज कारोबारमा आएका १३ वटै उपसमूहको परिसूचकमा हरियाली छाएको छ । व्यापार समूहको परिसूचक सबैभन्दा धेरै ४.६६ प्रतिशतले बढेकोे छ ।
आज आइएमई जनरल इन्स्योरेन्सको सर्वाधिक कारोबार भएको छ । यसको साढे ७ करोड रुपैयाँ बढीको सेयर किनबेच भएको छ । त्यस्तै, एनआइसी एशिया बैंकको ६ र सिटिजन्स बैंकको प्रमोटर सेयर पौने ६ करोड बढीको कारोबार हुँदै शीर्ष तीनमा रहे ।
दोहोरो अंकले बढेको बजार आज युनिक नेपाल लघुवित्तको सेयर मूल्यमा पोजेटिभ सर्किट लागेको छ । यसको सेयर मूल्य ठ्याक्कै १० प्रतिशतले बढेको छ ।
त्यसैगरी, न्यादी हाइड्रोपावर ७.७३, नयाँ सारथी लघुवित्त ६.१८, मानुषी लघुवित्त ५.६७, बुद्धभूमि हाइड्रोपावर, नेपाल पुनर्बीमा कम्पनी र मध्यभोटेकोशीको सेयर मूल्य साढे ४ प्रतिशतले बढेको छ ।
