काठमाडौं । सानिमा लाइफ र रिलायन्स लाइफ इन्स्योरेन्सले एक आपसमा गाभिन अन्तिम स्वीकृति पाएका छन् ।
मर्जर प्रक्रियामा रहेका दुई कम्पनीलाई मर्ज हुन नेपाल बीमा प्राधिकरणले अन्तिम स्वीकृति दिएको हो । प्राधिकरणबाट अनुमति पाएसँगै दुवै कम्पनीले चैत भित्रै एकीकृत कारोबार गर्ने तयारी गरेको जनाइएको छ ।
दुवै कम्पनीको फागुन १२ गते बसेका साधारण सभाले एक आपसमा मर्ज हुने प्रस्ताव पारित गरिसकेका छन् । यी दुई कम्पनी बीच गत असार २९ गते मर्ज सम्बनधी प्रारम्भिक सम्झौता भएको थियो ।
हाल सानिमा लाइफको चुक्ता पूँजी २ अर्ब ८ करोड र रिलायन्स लाइफको २ अर्ब १० करोड रुपैयाँ छ । मर्जरपछि बन्ने नयाँ कम्पनीको चुक्ता पूँजी ४ अर्ब १८ करोड रुपैयाँ पुग्नेछ ।
प्राधिकरणले यही चैतभित्र जीवन बीमा कम्पनीहरुलाई चुक्ता पूँजी ५ अर्ब पुर्याउन निर्देशन दिएको छ । सो अनुसार मर्जपछि पनि कम्पनीको चुक्ता पूँजी ९२ करोड रुपैयाँ नपुग्ने देखिन्छ ।
