काठमाडौं । मनोहरा जग्गा एकीकरण आयोजनाले अतिक्रमित घरटहरा हटाउन ७ दिनको म्याद दिएको छ ।
आयोजनाले आज एक सूचना जारी गर्दै आयोजना क्षेत्रभित्र रहेका घर, छाप्रा, टहरा तथा स्वीकृत नीतिबमोजिम फिर्ता गर्नुपर्ने विकसित घडेरीभित्र परेका पर्खाल हटाउन ७ दिनको समय दिएको हो ।
सम्बन्धित व्यक्तिले अवैध संरचना नहटाए आयोजना आफैले हटाउने र सो कार्यमा भएको खर्च कानुन बमोजिम असुल्ने आयोजनाले बताएको छ ।
आयोजना क्षेत्रभित्र स्वीकृत डिपिआरअनुसार सडक खोलेर स्वीकृत नक्साबमोजिम आयोजनाबाट विकसित घडेरीहरू सम्बन्धित जग्गाधनीलाई फिर्ता गरिँदै आइएको पनि आयोजनाले बताएको छ।
