काठमाडौं । निर्धन उत्थान लघुवित्त वित्तीय संस्थाको खुद नाफामा उच्च गिरावट आएको छ । लघुवित्तले बिहीबार सार्वजनिक गरेको चालु आर्थिक वर्षको दोस्रो त्रैमासको अपरिष्कृत वित्तीय विवरण अनुसार खुद नाफा ६५.८८ प्रतिशतले घटेको छ ।
लघुवित्तले चालु आवको पुस मसान्तसम्ममा १६ करोड ८५ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा ३२ करोड ५४ लाख रुपैयाँ कम हो । लघुवित्तले गत वर्षको पहिलो त्रैमासमा ४९ करोड ३९ लाख खुद नाफा कमाएको थियो ।
खुद ब्याज आम्दानी, संचालन मुनाफा घट्नुका साथै इम्पेयरमेन्ट चार्ज बढ्दा लघुवित्तको नाफामा भारी गिरावट आएको हो । समीक्षा अवधिमा लघुवित्तको खुद ब्याज आम्दानी ९.०९ प्रतिशत घटेर ९६ करोड ६८ लाख रुपैयाँमा सीमित भएको छ । त्यस्तै, सञ्चालन मुनाफा ६५.९१ प्रतिशतले घटेर २३ करोड ९३ लाखमा सीमित भएको छ ।
हाल २ अर्ब १९ करोड ५० लाख रुपैयाँ चुक्ता पूँजी रहेको लघुवित्तको रिटेन्ड अर्निङमा ६१ करोड ८१ लाख र जगेडा कोषमा १ अर्ब ९८ करोड रुपैयाँ संचित छ । यस अवधिमा लघुवित्तको वितरण योग्य नाफा १३ करोड १४ लाख रुपैयाँ छ ।
नाफामा गिरावट आएसँगै लघुवित्तको प्रतिसेयर आम्दानीमा ठूलो गिरावट आएको छ । समीक्षा अवधिमा लघुवित्तको प्रतिसेयर आम्दानी ४५.०१ रुपैयाँबाट घटेर १५.३६ रुपैयाँमा झरेको छ ।
समीक्षा अवधिमा लघुवित्तको प्रतिसेयर नेटवर्थ २१८.८३ रुपैयाँ, मूल्य आम्दानी अनुपात ६६.२८ गुणा र खराब ८.३८ प्रतिशत छ ।
