काठमाडौं । मुग्लिन–नारायणगढ सडकको वैकल्पिक सडक निर्माण भएको छ । यस सडकको विकल्पमा ४५ किलोमिटर लामो शक्तिखोर–फिस्लिङ सडक निर्माण गरिएको हो ।
यो सडक पृथ्वी राजमार्गको फिस्लिङ-शक्तिखोर हुँदै पूर्पश्चिम राजमार्गको टाँडीमा जोडिन्छ। यो सडक बनेसँगै अब मुग्लिन नारायणगढ सडकमा हुने जाममा फस्न नपर्ने भएको छ ।
सडक विस्तार, बाढी, पहिरो लगायत कारणले नारायणगढ–मुग्लिन सडकमा घण्टौं जाम हुँदै आएको छ । साथै, हाल पुल निर्माणका लागि भित्तो कटान गर्न दैनिक ४ घण्टा सडक बन्द गरिँदै आइएको छ ।
यस सडकबाट साना तथा मझौला सवारीसाधन सजिलै गुड्न सक्ने आयोजनाले जनाएको छ । ७.२५ मिटर चौडाइको यो सडक पूर्ण रुपमा निर्माण सकिएपछि भने ठूला गाडी समेत गुड्न सक्नेछन् ।
ग्रामीण सडक सञ्जाल सुधार आयोजना अन्तर्गत प्रदेश सरकारको लगानीमा २०७५ फागुनदेखि निर्माण सुरू गरिएको यो सकड ४ वर्षपछि सम्पन्न हुन लागेको हो । कोरोना महामारी, निर्माण सामग्रीको अभाव, प्राकृतिक जोखिमलगायतका कारणले यस सडक निर्माणको म्याद ५ पटकसम्म थपिएको थियो ।
एसियाली विकास बैंकको ८० प्रतिशत अनुदान र नेपाल सरकारको २० प्रतिशत लगानीमा बनेको हो । यस सडकको लागत ८७ करोड रहेको छ ।
