काठमाडौं । नेपाल स्टक एक्स्चेन्ज (नेप्से)मा सूचीकृत २५ वाणिज्य बैंकमध्ये अब कृषि विकास बैंकको मात्र लाभांश घोषणा हुन बाँकी छ ।
गत आर्थिक वर्ष २०७८/७९ को नाफाबाट २० वटा बैंकले लाभांश दिने भएका छन् भने ४ वटाले लाभांश नदिने घोषणा गरेका छन् । गत वर्षको नाफाबाट लक्ष्मी, सनराइज, एनआइसी एशिया र माछापुच्छे बैंकले लाभांश नदिने घोषणा गरेका हुन् ।
लाभांश घोषणा गरेका २० वाणिज्य बैंकमध्ये सबैभन्दा धेरै लाभांश नबिल बैंकले घोषणा गरेको छ । नबिलले गत वर्षको नाफाबाट ३० प्रतिशत लाभांश दिने घोषणा गरेको छ ।
गत वर्षको नाफाबाट सबैभन्दा कम सेञ्चुरी कमर्शियलले ५ प्रतिशत लाभांश वितरणको प्रस्ताव गरेको छ ।बैंकहरूले प्रस्ताव गरेको नेपाल राष्ट्र बैंकले स्वीकृत तथा सम्बन्धित बैंकको वार्षिक साधारणसभाले पारित गरेपछि मात्र सेयरधनीले पाउनेछन् ।
लाभांश घोषणा गरेका २० वाणिज्य बैंकमध्ये १७ बैंकले साधरणसभा प्रयोजनाका लागि बुकक्लोज समेत गरिसकेका छन् । १ दर्जन बढी बैंकले बैंकले साधारण सभा समेत सम्पन्न गरिसकेका छन् ।
लाभांश घोषणा गरेका हिमालयन, सिभिल र नबिल बैंकको अझै बुकक्लोज हुन बाँकी छ । हिमालयन र नबिलले पुस १८ गते र सिभिलले पुस १९ गते बुकक्लोज तोकेको छ । तसर्थ, यी ३ बैंकको सेयर किन्दा अझै प्रस्तावित लाभांश पाइन्छ ।
गत वर्षको नाफाबाट नबिलले ३० प्रतिशत (१८.५% बोनस र ११.५% नगद), हिमालयनले १९.११ प्रतिशत (८% बोनस र ११.११% नगद) र सिभिलले ५.२६ प्रतिशत (५% बोनस र ०.२६% नगद) लाभांश घोषणा गरेका छन् ।
