काठमाडौं । सेयर बजारमा करेक्शन आएको छ । अघिल्ला दुई दिनमा ११५ अंकले बढेको नेप्सेमा आज दोहोरो अंकको करेक्शन आएको हो ।
सूचकसँगै आज कारोबार रकममा पनि गिरावट आएको छ । अघिल्लो दिनको तुलनामा कारोबार रकम १ अर्ब ७३ करोडले घटेर २ अर्बमा सीमित भएको छ ।
बुधबार नेप्से ११.८१ अंकले घटेर १९७२.१५ विन्दुमा आइपुगेको छ । यसदिन २५७ कम्पनीको २ अर्ब १५ करोड रुपैयाँ बढीको ६५ लाख ३० हजार ४१५ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये ५ उपसमूहको परिसूचकमा हरियाली छाएको छ भने ८ उपसमूहको घटेको छ । होटल उपसमूह सबैभन्दा धेरै २.१९ प्रतिशतले घटेको छ ।
आज नबिल बैंकको सर्वाधिक कारोबार भएको छ । यसको पौने ९ करोड बढीको सेयर किनबेच भएको छ । त्यस्तै, रिडी पावर ८ करोड र अपर तामाकोशी साढे ७ करोड बढीको कारोबार हुँदै शीर्ष तीनमा रहे ।
दोहोरो अंकले घटेको बजारमा आधा दर्जन कम्पनीको सेयर मूल्यमा पोजेटिभ सर्किट लागेको छ । सेन्टर फाइनान्स, प्रभु लाइफ इन्स्योरेन्स र धौलागिरी लघुवित्तको सेयर मूल्य ठ्याक्कै १० प्रतिशतले बढेको छ ।
त्यसैगरी, खप्तड लघुवित्त, श्रृजनशील लघुवित्त र वीन नेपाल लघुवित्तका सेयरधनीले पनि करिब १० प्रतिशत कमाएका छन् ।
