काठमाडौं । लगानी बोर्डले काठमाडौं उपत्यकाको चक्रपथमा ७५ बिजुली बस सञ्चालमा ल्याउने तयारी गरिरहेको छ । २७.३० किलोमिटर लामो चक्रपथमा बिजुली बस गुडाउन अन्तिम सम्भाव्यता अध्ययनको तयारी गरेको हो ।
विद्युतीय बस चलाउन २० अर्ब लागतमा २७ स्टेसन, एक टर्मिनल र छुट्टै लेन निर्माणका लागि अध्ययन गर्न अन्तर्राष्ट्रिय टेन्डर आह्वान गरिएको थियो ।
बोर्डले सूचना जारी गर्दै सम्भाव्यता अध्ययन गर्ने इच्छुक संस्थाहरूलाई पुष ४ गतेसम्म प्रस्ताव पेस गर्न आह्वान गरेको थियो । बोर्डका प्रवक्ता अमृत लम्सालले स्वदेशी तथा विदेशी कम्पनी सहभागी हुन सक्ने गरी अन्तर्राष्ट्रिय प्रस्ताव आवहान गरिएको बताए । उनले हालसम्म फिजिकल्ली कुनै प्रस्ताव नआएकाले बोलपत्र आह्वान गरिएको बताए ।
‘पूर्वसम्भाव्यता अध्ययनले आयोजना बनाउन सक्ने देखाएपछि सम्भाव्यता अध्ययनको थप प्रक्रिया अघि बढाएका हौँ,’ लम्सालले चाणक्य पोष्टसँग भने, अहिलेसम्म फिजिकल्ली कुनै प्रस्ताव आएको छैन, पुष ४ सम्म बोलपत्रबाट कतिको प्रस्ताव आउछ त्यसै अनुसार प्रकृया अघि बढ्ने छ ।’
उनले अन्तिम सम्भाव्यता अध्ययन भएपछि आयोजना कुन मोडलमा निर्माण गर्ने बताउन सकिने बताए । अध्ययनपछि निजी–सरकारी साझेदारी (पीपीपी) मोडेलमा आयोजना निर्माण गर्न टेन्डर आह्वान गरिने उनले बताए ।
यसअघि २०१९ मा आयोजनाको पूर्वसम्भाव्यता अध्ययन गरिसकेको थियो । अन्तिम सम्भाव्यता अध्ययन गर्न कार्तिक अन्तिममा अन्तर्राष्ट्रिय प्रस्ताव आह्वान गरिएको थियो ।
पहिलो चरणमा लामो आकारका ७५ वटा बिजुली बस सञ्चालन गर्ने गरी २७ बस स्टेसन र एक टर्मिनल बनाउने योजना रहेको बोर्डले जनाएको छ । विस्तृत आयोजना प्रतिवेदन (डीपीआर) तयार भएपछि मात्र के कति निर्माण गर्ने टुंगो लाग्ने लम्सालले बताए ।
उक्त आयोजना बनाउन १५ करोड ३० लाख डलर लागत अनुमान गरिएको छ । सम्भाव्यता अध्ययन सम्पन्न भएपछि पीपीपी मोडलमा आयोजनाको निर्माण अघि बढाइने छ ।
आर्थिक वर्ष २०७१/७२ को बजेटमै काठमाडौं उपत्यकाको सार्वजनिक यातायात व्यवस्थित गर्न धेरै यात्रुहरू अट्ने बस र्यापिड ट्रान्जिट (बीआरटी) योजनाको घोषणा गरिएको थियो । त्यसपछि ०७५ मा लगानी बोर्डले यो योजना अगाडि बढाएको थियो । २०१९ मा सम्पन्न लगानी सम्मेलनमा यो आयोजना निर्माण र सञ्चालन गर्न ४ लगानी प्रस्ताव आएका थिए ।
दैनिक २ लाख यात्रुले सेवा लिने
चक्रपथमा बिजुली बस संचालनमा ल्याएपछि दैनिक साढे २ लाख यात्रुले सेवा लिने बताइएको छ । बोर्डले २०१९ मा गरेको पूर्वसम्भाव्यता अनुसार यसमा दैनिक बढीमा २ लाख ४० हजार यात्रुले सेवा लिन सक्नेछन । न्यूनतम भने १ लाख ५४ हजार यात्रु पाइने बोर्डको भनाइ छ । २०२९ सम्म भने दैनिक अधिकतम ३ लाख ८ हजार र न्यूनतम १ लाख ७० हजार यात्रु हुने बोर्डको अनुमान छ ।
