काठमाडौं । राष्ट्रिय गौरवको आयोजना माथिल्लो तामाकोशीको खुद नाफामा सामान्य गिरावट आएको छ । कम्पनीले बुधबार सार्वजनिक गरेको चालु आर्थिक वर्ष २०७९/८० को पहिलो त्रैमासको अपरिष्कृत वित्तीय विवरण अनुसार खुद नाफा ७.२४ प्रतिशतले घटेको छ ।
कम्पनीले असोज मसान्तसम्म ७९ करोड ७७ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा ७ करोड कम हो । तामाकोशीले गत वर्षको पहिलो त्रैमासमा ८६ करोड खुद नाफा कमाएको थियो ।
विद्युत् विक्रीबाट हुने आम्दानी बढे पनि प्रशासनिक, वित्तीय खर्च बढ्दा कम्पनीको नाफामा गिरावट आएको हो । समीक्षा अवधिमा कम्पनीको विद्युत् विक्रीबाट हुने आम्दानी दोब्बरले बढेको छ । गत वर्ष बिजुली बेचेर १ अर्ब ७२ करोड रुपैयाँ कमाएको कम्पनीले चालु आवमा ३ अर्ब ५६ करोड रुपैयाँ आम्दानी गरेको छ ।
हाल १० अर्ब ५९ करोड रुपैयाँ चुक्ता पूँजी रहेको कम्पनीको रिटेन्ड अर्निङ १ अर्ब ९४ रुपैयाँ ऋणात्मक छ । समीक्षा अवधिसम्म कम्पनीको दीर्घकालीन ऋण ७३ अर्ब ६३ करोड र अल्पकालीन ऋण ५ अर्ब ७८ करोड रहेको छ ।
नाफामा गिरावट आएसँगै कम्पनीको प्रतिसेयर आम्दानी पनि घटेको छ । समीक्षा अवधिमा कम्पनीको प्रतिसेयर आम्दानी ८.१२ रुपैयाँबाट घटेर ७.५३ रुपैयाँमा झरेको छ । कम्पनीको प्रतिसेयर नेटवर्थ ८१.५९ रुपैयाँ, प्रतिसेयर मूल्य सम्पत्ति ८४८.७३ रुपैयाँ छ ।
कम्पनीले दोलखामा ४५६ मेगावाट क्षमताको अपर तामाकोशी हाइड्रोपावर आयोजना निर्माण सम्पन्न गरी संचालनमा ल्याइसकेको छ ।
