काठमाडौं । वाणिज्य बैंकको निक्षेपमा फेरि गिरावट आएको छ । असोज अन्तिम सातासम्म लगातार बढेको बैंकहरुको निक्षेप कात्तिक लागेसँगै घट्न थालेको हो
नेपाल बैंकर्स संघको तथ्यांक अनुसार असोज मसान्तको तुलनामा कात्तिक ११ गतेसम्म आइपुग्दा वाणिज्य बैंकहरुको निक्षेप २३ अर्बले घटेको छ ।
असोज मसान्तमा ४५ खर्ब ४७ अर्ब पुगेको निक्षेप ४ कात्तिकमा ४५ खर्ब ४१ अर्बमा झरेको थियो । पछिल्लो एक सातामा निक्षेप थप १७ अर्बले घटेर ४५ खर्ब २४ अर्ब कायम भएको छ ।
बैंकहरुको कर्जा भने असोज लागेपछि ५ अर्बले बढेको संघको तथ्यांकले देखाउँछ । बैंकहरुको कुल कर्जा लगानी असोज मसान्तमा ४२ खर्ब २० अर्ब रहेकोमा ४ कात्तिकमा ५ अर्बले बढेर ४२ खर्ब २५ अर्ब पुगेको थियो ।
यस अवधिसम्म आइपुग्दा बैंकहरुको कर्जा लगानी ४२ खर्ब २५ अर्ब रहेको छ। गत आर्थिक वर्षको अन्तिम असार मसान्तमा ४५ खर्ब ४१ अर्ब वाणिजय बैंकहरुको कुल निक्षेप पुगेको थियो ।
यस्तै चालु वर्षको पहिलो महिना साउन मसान्तमा घटेर४४ खर्ब ३३ अर्बसम्म सिमित भएको थियो । भदौमा बढेर ४४ खर्ब ८६ अर्ब पुगेको निक्षेप असोजमा ४५ खर्ब ४७ अर्बसम्म पुगेको थियो ।
यस्तै कर्जा लगानी असार मसान्तमा ४१ खर्ब ७५ अर्ब रहेकोमा साउन मसान्तमा ४१ खर्ब ७७ अर्ब, भदौ मसान्तमा ४१ खर्ब ९० अर्ब र असोज मसान्तमा ४२ खर्ब २० अर्ब पुगेको बैंकर्स संघले जनाएको छ ।
निक्षेप घटेसँगै बैंकको सीडी रेसीयो बढ्दै गएको छ । गत महिना ८७ प्रतिशत तल झरेको सीडी फेरि उकालो लाग्न थालेको हो । तिहार र छठमा मानिसले बैंकबाट निक्षेप झिकेर खर्च बढेसँगै कर्जा लगानी नहुँदा पनि निक्षेप घट्दो छ ।
फेरि चुनावी गतिविधि बढेको छ । जसले गर्दा अझै प्रणालीमा तरलता अभाव हुने बैंकरहरुको भनाइ छ । गत वर्षको दोस्रो त्रैमासदेखि संस्थाहरुको कर्जा लगानी वृद्धि हुन सकेको छैन् । जसको कारण व्यवसाय तथा नाफामा गिरावट आउने आकलन गर्न थालिएको छ ।
