काठमाडौं । आइसीएफसी फाइनान्सको खुद नाफामा गिरावट आएको छ । कम्पनीले मंगलबार सार्वजनिक गरेको चालु आर्थिक वर्षको पहिलो त्रैमासको अपरिष्कृत वित्तीय विवरण अनुसार खुद नाफा गत वर्षको सोही अवधिको तुलनामा २९.७९ प्रतिशतले घटेको छ ।
कम्पनीले चालु आवको असोज मसान्तसम्म ३ करोड ३४ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा १ करोड ४२ लाख रुपैयाँ कम हो । गत वर्षको पहिलो त्रैमासमा फाइनान्सले ४ करोड ७६ लाख रुपैयाँ खुद नाफा कमाएको थियो।
खुद ब्याज आम्दानी बढे पनि इम्पेरमेन्ट चार्ज बढ्दा फाइनान्सको नाफामा गिरावट आएको हो । समीक्षा अवधिमा फाइनान्सको खुद ब्याज आम्दानी ३४.९१ प्रतिशत बढेर १४ करोड ८८ लाख पुगेको छ । कम्पनीको खुद फी तथा कमिसन आम्दानी ४४.७२ प्रतिशत घटेर १ करोड ८८ लाखमा सीमित भएको छ भने सञ्चालन मुनाफा २७.०१ प्रतिशत घटेको छ।
हाल १ अर्ब १२ करोड चुक्ता पूँजी रहेको कम्पनीको रिटेन्ड अर्निङमा ९ करोड ४३ लाख र रिजर्भ कोषमा ५४ करोड ३ लाख रुपैयाँ संचित छ ।
खुद नाफामा गिरावट आएसँगै फाइनान्सको प्रतिसेयर आम्दानी ५.०४ रुपैयाँ घटेर ११.८७ रुपैयाँमा सीमित भएको छ । समीक्षा अवधिमा फाइनान्सको प्रतिसेयर नेटवर्थ १५६.३२ रुपैयाँ, मूल्य आम्दानी अनुपात ३६.८९ गुणा, खराब कर्जा १.३१ प्रतिशत छ ।
