काठमाडौं। गत वर्षदेखि रुस र युक्रेन युद्धले अन्तर्राष्ट्रिय बजारमा पेट्रोलियम पदार्थको मूल्य आकाशिदै गएको छ । पश्चिमा देशहरुले रुसमाथि लगाएको प्रतिबन्धले विश्वभर इन्धनको माग बढेसँगै मूल्य पनि बढेको हो ।
इन्धनको आपूर्ति प्रणाली खल्बलिएपछि अधिकांश देशहरुले चर्को मूल्यवृद्धिको सामना गरिरहेका छन् । पेट्रोलियम पदार्थमा आएको उतारचढावले आपूति असहज मात्र बनाएको छैन् उत्पादन तथा ढुवानी लागत पनि बढाएको छ । पछिल्लो समय भने अन्तर्राष्ट्रिय बजारमा कच्चा तेलको मूल्य केही घटेको छ ।
गत फेब्रुअरीमा प्रतिब्यारेल १३९ डलर पुगेको कच्चा तेलको मूल्य पछिल्लो एक महिना यता एकसय डलरको हाराहारीमा रहेको छ । तिहारअघि प्रतिब्यारेलको मूल्य ९७ डलर रहेकोमा हाल घटेर ९५.७७ डलर कायम रहेको छ । केही समय ओरालो लागेको इन्धनको मूल्य फेरि बढ्नसक्ने आकलन गरिएको छ ।
तेल उत्पादक देशहरूको समूह ओपेकले दैनिक २० लाख ब्यारेल उत्पादन कटौती गर्ने घोषणा गरिसकेको छ भने मागमा हुने वृद्धिले इन्धन अभाव हुनसक्ने अन्तर्राष्ट्रिय आपूर्ति संस्थाहरुको भनाइ छ ।
गत जनवरीदेखि जारी रुस युक्रेन युद्धमा विश्वको तेस्रो तेल निर्याता देश रुसमाथि अमेरिका र पश्चिमी मुलुकहरूले आर्थिक नाकाबन्दी र तेल आयातमा प्रतिबन्ध कायमै राखेका छन् ।
इन्धन अभाव र त्यसको मूल्यवृद्धिले दैनिक उपभोग्य तथा खाद्य सामग्रीको मूल्य सोही अनुसार बढेको छ । जसको कारण विशेषगरी इन्धन आयातकर्ता देशहरु समस्यामा परेका छन् ।
