काठमाडौं । पेट्रोलमा प्रतिलिटर १४.५६ रुपैयाँ नाफा भए पनि नेपाल आयल निगमले तत्काल भाउ नघटाउने भएको छ । अहिले नाफा भए पनि विगतमा धेरै नोक्सानी भएको भन्दै निगमले मूल्य नघटाउने भएको हो ।
निगमले एक सूचना जारी गर्दै इन्डियन आयल कर्पोरेशन, नेपाल सरकार र राष्ट्रिय वाणिज्य बैंकलाई गरी ३३ अर्ब ६० करोड रुपैयाँ तिर्न बाँकी रहेको भन्दै भाउ नघटाउने जानकारी गराएको छ ।
असोज ३० गते (आइतबार) आइओसीबाट प्राप्त नयाँ मूल्य सूची अनुसार निगमलाई पेट्रोल, हवाई इन्धन र मट्टीतेलमा उच्च नाफा रहेको छ ।
निगमलाई पेट्रोलमा प्रतिलिटर १४.५६ रुपैयाँ, मटितेलमा ३८.५८ रुपैयाँ र हवाई इन्धन आन्तरिकतर्फ ४०.७८ रुपैयाँ र अन्तर्राष्ट्रियतर्फ ९०.९८ रुपैयाँ नाफा छ । यी वस्तुमा उच्च नाफा रहे पनि सञ्चित नोक्सानीका कारण तत्काल मूल्य समायोजन गर्न नसकनिे निगमले जनाएको छ ।
नयाँ मूल्य सूची अनुसार पेट्रोलको प्रतिलिटर लागत १६६.४४ रुपैयाँ छ भने विक्री मूल्य १८१ रुपैयाँ रहेको छ । आगामी १५ दिनमा पेट्रोमा मात्रै ३६ करोड नाफा हुनेछ । त्यस्तै, आन्तरिक हवाई इन्धन विक्रीबाट ११.१५ करोड र अन्तर्राष्ट्रियतर्फ ४७.७० करोड नाफा हुनेछ ।
निमगलाई डिजेल र खाना पकाउने ग्यासमा भने नोक्सानी रहेको छ । डिजेलमा प्रतिलिटर ६.३४ रुपैयाँ र ग्यासमा प्रतिसिलिण्डर ३२५ रुपैयाँ घाटा रहेको निगमले जनाएको छ ।
२० महिनादेखि लगातार घाटामा रहेको निगम गत महिनादेखि नाफामा जान थालेको छ । आगामी १५ दिनमा समग्रमा ३९ करोड ९३ लाख नाफा हुने निगमको भनाइ छ ।
