काठमाडौं । सेयर बजारमा दोहोरो अंकको गिरावट आएको छ । आइतबार एकैदिन ४४ अंकले बढेको नेप्सेमा आज उच्च अंकको गिरावट आएको हो ।
नेप्सेमा आएको उछाल एकदिन पनि टिक्न सकेन । दशैंपछि कारोबार खुलेको पहिलो दिन उच्च अंकले बढेको नेप्सेले लय समाउने लगानीकर्ताको आकलन भए पनि बजारले गति लिन सकेन ।
सोमबार नेप्से परिसूचक २७.१६ अंकले घटेर १८७१.२२ विन्दुमा आइपुगेको छ । यसदिन २३३ कम्पनीको ९७ करोड १७ लाख रुपैयाँ बढीको ३१ लाख ५५ हजार ६९५ कित्ता सेयर खरिद विक्री भएको नेप्सेले जनाएको छ ।
आज कारोबारमा आएका १३ वटा उपसमूहमध्ये सामूहिक लगानी कोष बाहेक अरु सबै समूहको परिसूचक राताम्मे भएको छ । विकास बैंक समूह सबैभ्न्दा धेरै २.६५ प्रतिशतले घटेको छ ।
आज हिमालयन एभरेष्ट इन्स्योरेन्सको प्रमोटर सेयर सर्वाधिक कारोबार भएको छ । यसको साढे १६ करोड बढीको सेयर किनबेच भएको छ ।
उच्च अंकले घटेको बजारमा आज गरिमा विकास बैंकका डिबेन्चरधनीले सर्वाधिक ८.१३ प्रतिशत गुमाएका छन् । त्यस्तैगरी, सिभिल लघुवित्त ६.३३, कृषि विकास बैंकको डिबेन्चर (२०८३) ५.८६, कर्णाली डेभलपमेन्ट बैंक ५.४६, पन्चकन्यामाइ हाइड्रोपावर, महुली लघुवित्त, पाँचथर पावर, मिथिला लघुवित्त, आशा लघुवित्तको सेयर मूल्य ५ प्रतिशतभन्दा धेरै घटेको छ ।
