काठमाडौं । साझा यातायातका ३७ वटा विद्युतीय बस चीनबाट नेपाल ल्याउन लागिएको छ । साझाका ४० वटा विद्युतीय बस मध्ये यसअघि गत चैतमा ३ वटा ल्याइएको थियो । बाँकी ३७ वटा अहिले ल्याउन लागिएको हो ।
साझाका कार्यकारी निर्देशक भुषण तुलाधरले ३७ वटा विद्युतीय बस चीनको न्यान्जिङ्गबाट काठमाडौंका लागि पठाइएको जानकारी दिए ।
उनले साझाका बस ट्रेलरमा राखेर ल्याउन लागिएको बताए । तातोपानी नाका हुँदै ती बस काठमाडौं ल्याइने उनले बताए ।‘साझाका ३७ वटा विद्युतीय बस बोकेका ट्रेलर चीनबाट हिँडिसके । पहिला ३ वटा बस ल्याइएको कोदारी हुँदै ल्याइन्छ,’ उनले भने, ‘सम्भवतः दशैंपछि ती बस भन्सारमा आइपुग्ने छन् ।’
चिनियाँ कम्पनी सीएचटीसी (नान्जिङ) अटो कम्पनी लिमिटेडले साझाका ४० वटा विद्युतीय बस बनाउने ठेक्का पाएको थियो । सरकारले २०७५ पुष ९ गते ३०० वटा विद्युतीय बस सरकारी लगानीमा किन्ने निर्णय गरेको थियो । सरकारले २०७६ सालमा साझा यातायातलाई विद्युतीय बस किन्न दिने निर्णय गरेको थियो ।
कोदारी हुँदै न्यान्जिङ्ग–काठमाण्डौं यात्रा शुरु, साझा यातायातका ३७ बिजुली बस @ Sajha Yatayat's 37 CHTC EV departing Nanjing manufacturing plant for Kathmandu via Kodari-Zhangmu landport.#मर्यादितयात्रा #DignifiedPublicTransport pic.twitter.com/hx0G11dVvs
— Sajha Yatayat (@SajhaYatayat) September 30, 2022
साढे ८ मिटर लामो २६ सिटे विद्युतीय बस ल्याएको हो । साझा यातायातले भ्याटसहित कुल ६१ करोड रुपैयाँ लगानीमा ४० वटा विद्युतीय बस ल्याएको हो । एउटा गाडीको मूल्य भ्याटसहित डेढ करोड रुपैयाँ हाराहारी पर्ने अनुमान गरिएको छ ।
बसका लागि आवश्यक चार्जर सोही कम्पनीले ल्याउने छ । कम्पनीले २० वटा चार्जिङ स्टेसन बनाएर दिने छ । उक्त कम्पनीले बस ल्याएको ५ वर्षको मर्मत सम्भार समेत निःशुल्क गर्नुपर्ने व्यवस्था सम्झौतामा उल्लेख भएको तुलाधारले बताए ।
२६ सिट क्षमताका बस अपाङ्गतामैत्री रहने छन् । यी बस एकपटक चार्ज गरेपछि ४२ भन्दाबढी यात्रु लिइ २०० किमी गुड्न सक्नेछन् । यी बसहरूमा वाइफाइ, टीभी डिसप्ले, सीसी क्यामेरा लगायतका विशेषता हुनेछन् ।
